Japan In 10-0 In Myanmar An Sop Neknek

2022 World Cup tel thei dingih zuamawknak hrang Japan le Myanmar cu ,May 28 ,zanlam nazi 4:50pm ah Japan ram ah bawhlung an sit ih caan a cem cu Japan in 10-0 in Myanmar an sop neknek. Myanmar player kim khal sehla Japan neh ding cu a harsa ding ti laiah Myanmar mithiam 10 hrawng cu ralkap uknak dokalh in an tel paih lo.

Puai an thok hnu minute 8-nak ah Premier league club Liverpool player Minamino in Japan hrang goal hmaihruai a thun ih minute 22-nak ah Bremen player Osako in Japan hrang goal 2-nak a thun. Caan hrek tiang an lekmi ah Japan in goal 4 an thun thei ih Myanmar lamin goal an nei lo. Caan neta sawn an lek peh cu Japan in goal 6 an thun betih caan cem ah 10-0 in nehnak an co. Myanmar cun goal 1 hman an thun thei lo tlunah Japan khawl zawn ah vei 2 lawng an sit fuh thei. Cumi khal tihnung umlo tuk veve a si.

Japan hrang Osako cun goal 4 thun in hattrick a tuah ih Minamino in goal 2 a thun. Culo cu Morita , Kamada le Itakura tipawl in goal 1 ciar an thun. Myanmar hrang Chinpa Salai David Htan cu puai thokin a lut hngal ih Suan Lam Mang cu minute 86 ah midang thlengin a lut ve. Laitlan Laldinmawia cu leknak caan a co ve lo. Myanmar cu June 11 Kyrgyzstan le june 15 ah Tajikistan team thawn lek hrih ding an si.

Myanmar aiawh in Japan ih feh player lakah mi pakhat lawngin ralkap uknak dokalh in bualrawn sungah a kutzung pathum a thlir ih amah cu thelhbawh ih to kawlkil Pyay Lywin Aung a si.

Be the first to comment

Leave a Reply

Your email address will not be published.


*