Tuizan UEFA Champions League Final Ah Man City Vs Chelsea ( Thlirnak Cipciar )

Euro bawhlung thuneitu sangbik UEFA kuthnuai ih club zuamawknak sangbik UEFA Champions league final cu may 30 ,zinglam nazi 1:30am ah lek ding a si ih Premier league club veve Man City le Chelsea in Champion Laksawng an cuh aw ding.

Club pahnih cu Premier league club veve an si bangin ,tui season premier league ah vei 2 rak do aw zo an si ih Chelsea in a vei hnih in nehnak an co veve. Cumen si hrih loin FA cup semi final khalah Chelsea cun Man City cu 1-0 in an rak neh thotho ih final an rak lut zo. Asinan, FA cup final ahcun Leicester City an neh lo ih pahnihnak dinhmun in an rak duhtawk.

Premier league ih an doawk caan ah Chelsea innpi ah 2-1 in Chelsea in nehnak an rak co ih Man City innpi khalah 1-2 in Chelsea in nehnak an co thotho. Tuitum Champions league final cu tui season lawngah vei 4 an doawknak a si thlang ding. Tui tumih an leknak ding hmun cu Portugal ram Estadio Do Dragao bualrawnpi ah a si dingih Skynet ,Sony LIV, Ten 2,Ten 3 pawl ah TV in live a zoh theih ding.

Chelsia Coach Tuchel cu nikum Champions League final ah PSG luhpi theitu a si ih final ah Bayern Munich an rak neh lo. Tui season ah Chelsea cu Champions League final a luhpi sal ih final ah Germanay lamih an rak ngam zetmi Man City Coach Guardiola a do ding. Tuchel hi Dormund Coach hlun a si bangin Bayern Coach hlun Guardiola thawn German lamah an rak do aw rero zo.

Chelsea lamah mallai nuam lo deuh kawlkil Mendy le laitlan Kante cu damtha felfai zo in an tel thei ding tiah theih a si ih Man City lamah player rinsanmi damlo besia an um lo. An team 2 in duhtawk sumpai hmangih player lei le player tha tampi nei veve an si ih thlelhbawh to lam khalah duhhril ding an nei veve.

Man City cu premier Leaegue ah an champion fel zo ih Chelsea khal top 4 in Premier league an khar thei. Chelsea cu 2012 kum ah Champions league veikhat an rak champion zo ih 2008 kum Champions league final ah Man United neh loin an rak sung. Man City cu an club thuanthu ah Champions league final an luh vei khatnak a si. Covid 19 natnak ruangah Bawhlung sit cu a hmun ah zoh sian lo a si ringring nan, Champions league final ahcun mipum 16,500 cu Bualrawn sungah lut in an zoh thei ding. Cumi sungin Chelsea le Man City tantu lakin mipum 6000 veve ticket pek an si.

Lai ni thla siar dan cun may 29 tuizan zarhte zan Myanmar nazi 1:30am ah lek thok ding an si ih mirang ni thla siar dan cun May 30 ,zarhpi zing zinglam nazi 1:30am ah lek thok ding an si. Tui season an doawknak sulhnu zoh tikah Chelsea in an neh ringring nan, tui Champion league final ahcun Man City in nehnak an co ko ding tiah mi tamsawn cun an zum. Nangteh ziangtin na ruat ve?

Be the first to comment

Leave a Reply

Your email address will not be published.


*