Covid 19 Natnak Lakin Fimkhur Ṭulbik Le Cinkeng Ringring Dingmi Thil Phun ( 5 )

Covid 19 natnak cu thla 8 sunglai a rei zo nan, tuini tiang rehfel ti a um hrih lo ih a nathrik thahnak sii khal a suak hrih lo. Russia in a khamnak sii kan tuahsuak a timi khal a aupi kungko rero nan , a ramsung mipi hman pe thei hrih lo a si ih natnak cu leitlun ah a darh deuhdeuh. Himi ah sii siloin mahte kilhimawk dan le ralrin dan ṭha tuk a um ih cingkeng ringring aw.

1.Kut faiten kholh aw – Kan theih depdep zomi a si ih a takin kan tuah rori ṭulmi khal a si. Lenglam na um lawngah siloin Inn ih na um ringring khalah tangka tham theu na si cu kut faiten kholh a ṭulnak san a si. Thil na ei ding , na mit , na hnar lole na kaa na tham ding tinten na kut faiten kholh hmaisa ringring aw. Satpia thawn kut kholh khalah a malbik vei 30 tal siar ih kholh thei ding ti a si. Ziangruangah ti asile nat kainak bik pakhat cu kut in tangsa peng dangah a si.

2.Mask bun aw – Midang zohrang khal a si lo ih nangmai hrang rori a si. Leng na suah ding tinten na hnar le kaa hup an ṭul ruangah mask bun ringring aw. Mask bun in za ah za nat lut ding a kham felfai tinak a si lo nan, nat lut ding tamzet, olsam tukih suanawk thei dan cu a kham rori tiah an hmu fel zo. Curuangah leng na suah cun mask bun ringring aw.

3.Duhduh in mit ,hnar le kaa tham hlah – Covid 19 kainak bik cu mit ,hnar le kaa tiah hmuhsuah a si ih kut kholh fai loin mit , hnar le kaa tham tikah nathrik cu sunglam ih lut cih hngal a si. Curuangah duhduh in na mitberh coih hlahla, duhduh in na hnapkhir khal coih hlah. Na mit , hnar le kaa na tham ding tinten na kut na kholhfai paih lo asile tissue thar hlamte , towel fai lole puan fai cia tivek hman aw. Leng suah caan hrimhrim ahcun mit , hnar le kaa tham lo ih um cu a himbik.

4.Tangka na tham tinten kut kholh aw – Covid 19 natnak cu tangka in suanawk a theih tiah phuan zo a si ih nat nei pakhat in thei aw loin bank ah tangka a thun ,a suah asile tangka par ah nathrik a bet thei ih tangka tham le dai cu nathrik kai vivo theih a si. Cumi lo khalah dawr ih thil leinak hmang khalin kai theih thotho a si ruangah tangka na siar thluh , na tham thluh tinten na kut faiten kholh ringrig aw.

5.Leng suahnak thuamhnaw thlengih dai bual ding – A hleice in covid 19 nat umnak khawpi lole khua ah na um ,na umnak khua lole khawpi ah covid 19 nat nei an um timi felfai ten theihnak hmun a si ahcun leng suahnak thuamhnaw cu inn thlen veten sop hngal lole sawpnak ding hmunah ret cih ding a si. Cumi tlunah taksa khal tidai bualfai cih ding. Ziangahtile nat umnak hmun ahcun kan thuamhnaw ih daimi ah nathrik a bet thei ih innsung kan luhpi lo ding a thupi tuk.

Himi 5 pawl cu mahte tuah theih , sii ei ciamco khal ṭul loin covid 19 lakin kilhimawk dan le ralrinnak ṭhabik an si ih cinken thlak le thlun ding rorimi a si. ( Dr.James )

Be the first to comment

Leave a Reply

Your email address will not be published.


*