6D Thawn Phun 10 Ong Thei Chin Tleirawl Sunloihnak Ah Esther Le Tan Khun Kyaw Tel

Rethei zet tlunah pa nei nawn lo, a nui’ hmeihpi dinhmun in 6D thawn phun 10 ong thei Chin tleirawl Wai Yan Linn Kyaw ( Salai Bo Htaw ) cu tuisun ah Chin Christian Alliance ( CCA ) hohanak in Yangon ah sunloihnak caan hman a si ih Myanmar Idol season 4 in ramsung mipi theih hlasakthiam Tan Khun Kyaw le Esther khalin an telpi ve.

Irrawaddy ramṭhen Kyiankhin Myone Zinandaung khua ih fimzir Salai Bo Htaw cu tui kum Myanmar rampum huap phun 10 result ah Wijar dinhmun in Myanmar ramsung ih hmat hmu tambik 520 le 6D ngah thei a si. A nauhak lai in a pa in a rak thihsan zo ih a nu ( Asho Chin ) in a hmeihpi. Unau 3 an si ih a u pakhat pasal nei zo cu Thailand ah hlawh aw in a nau cu phun 8 kai rero lai a si. An Unau hnih tlawngkainak ding cu Thailand ih a u in theitawk a kuat ṭheu. Asinan, amah khal innsang thawn a si tikah duhvekin a kuat thei lo ih Salai Bo Htaw tei unau cu harsa zetin tlawngkai an si.

Salai Bo Htaw cu bawda tivek khalah um thei lo, tuition kai thei lo a si ih tlawnginnpi ah kai in theitawk ca zuam a si. An khua ah meisa a um lo ih phone khal hman theih lo a si. Asinan, a dinhmun ih zir in theitawk a zuam ih harsatnak ruangah beidong men loin ca ṭhaten a zir ,a zuam cu 6D thawn phun 10 a on tlunah Wijar twin ah rampum huapin hmat hmu tambpi a si phah.

Phun 10 cu dinhmun ṭha zetin a ong nan,phunsang tlawng pehnak ding sumpai a neih lo ruangah a thuhla cu online ah thlah a si ih phunsang tlawng a kainak ding hrang bawmtu ding a neih zo tlunah tuini ah CCA in Yangon khawpi ah ropi zetin sunloihnak an nei. Sunloihnak ahcun capi phunphun, laksawng phunphun le sumpai khal hlan a si. Himi ah rampi huap hlasakthiam pahnih Tan Khun Kyaw le Esther khalin an telpi ih zaihla in mipi an awi tlunah Chin tleirawl Salai Bo Htaw cu ṭongkam in thazang peknak an nei ih laksawng khal an pe veve a si.

Be the first to comment

Leave a Reply

Your email address will not be published.


*