Chin Ramkulh Falam Khawpi Ih Tlawnginn Pakhat Ah Bomb A Puak

Chin ramkulh Falam khawpi cinmual vengih um Ah-tha-kah 2 tlawnginn ah bomb a puak thu kiangkap mipi hnenin theih a si ih bomb puak sulhnu khal hmuh a si.

Cinmual veng ah thah kah 2

May 26, zinglam nazi 2 hrawngah bomb puak a si ih bomb puak lai caan ahcun zohman zoh ngam loin ,tuizing khawvang hnuah an zoh cu bomb puak ruangah cazirnak hmun tlawnginn hrekkhat a siat thu mit hmutu cun a rel. Tuhrih ahcun bomb puak ruangah hriamhma tuar le thi an um thu theih a silo. Cinmual veng Ah-thah-kah tlawnginn sungih bomb puak thuhla kan ngan theh hnuah Matubuk vengih Ah-mah-kah 5 tlawnginn sung khalah bomb a puak tiah theih bet a si.

Matubuk ah mah kah 5

Ralkap cun May 24 in ramsung hmun tinkim ah tlawng hminpe pe dingin caan a on thokih Chin ramkulh sungah myone 9 lakin myone 7 ah tlawng hminpe an um ih cumi sungin Falam khawpi ah tlawng hminpe an tam bik tiah fimzir zung cun thu an rak suah. May 25 ih tlawng hminpe cazin cu theih a si hrih lo.

May 24 ih Chin ramkulh sung myone hrekkhat in tlawng hminpe cazin an tarlangmi cu Falam ah 244, Tonzang ah 205, Tedim ah 198 le Hakha ah 28 tipawl an si tiah fimzir zung hotu cun a rel. Mindat le Kanpetlet ahcun mipi humhimtu le ralkap buainak ruangah tlawng hminpe an um lo tiah theih a si ih mipi tamzet cu himnak hawl in hramlak ah an tlan a si.

Be the first to comment

Leave a Reply

Your email address will not be published.


*