Chin Ramkulh Falam Khawpi Tlawnginn Hmun 2 Ah Bomb A Puak

Chin ramkulh Falam khawpi ih tlawnginn hmun 2 ah bomb a puak thu theih a si ih Matubuk le Cinmual vengih tlawnginn ah an si.

Cinmual veng Ah-Thah-kah 2 tlawnginn ah may 26, zinglam nazi 2am hrawngah bomb a puak ih Matubuk ah-mah-mah 5 tlawnginn ah zinglam nazi 3am hrawngah bomb a puak. Cinmual veng tlawnginn ih bomb puak siseh Matubuk veng tlawnginn ih bomb puak khal tlawnginn a siat phah tuk veve.

Matubuk veng Ah-mah-kah 5 tlawng ih bomb puak ruangah tlawnginn a siat nasa ih cazirnak hrang a hman theih lo ding. Cinmual veng Ah-Thah-Kah 2 tlawnginn sungih bomb puak khalah tlawnginn cazirnak a siat phah tuk ve. Bomb puak ruangah hriamhma tuar le mithi an um thu theih a silo.

Ralkap cun May 24 in ramsung hmun tinkim ah tlawng hminpe pe dingin caan a on thokih Chin ramkulh sungah myone 9 lakin myone 7 ah tlawng hminpe an um ih cumi sungin Falam khawpi ah tlawng hminpe an tam bik tiah fimzir zung cun thu an rak suah. May 25 ih tlawng hminpe cazin cu theih a si hrih lo.

May 24 ih Chin ramkulh sung myone hrekkhat in tlawng hminpe cazin an tarlangmi cu Falam ah 244, Tonzang ah 205, Tedim ah 198 le Hakha ah 28 tipawl an si tiah fimzir zung hotu cun a rel. Mindat le Kanpetlet ahcun mipi humhimtu le ralkap buainak ruangah tlawng hminpe an um lo tiah theih a si ih mipi tamzet cu himnak hawl in hramlak ah an tlan a si.

Be the first to comment

Leave a Reply

Your email address will not be published.


*