Chin Ramkulh Paletwa Peng Ah Naupai Nupinu Pawl Nau Thla An Tam Deuhdeuh

Rakhine ralkap AA le Myanmar ralkap doawk ringringnak Paletwa peng ah naupai nupinu pawl nau thla an tam deuhdeuh thu Paletwa peng Department of Health and Medical Care ih hotu Dr.Soe Thet Win in a rel.

Tui kum January thla ihsin July thla tiangah Paletwa peng sungin nupinu 54 in nai an paimi an thlasal tiah hminsin a um ih nau an thlaknak san cu an umnak a him lo tuk, ral tamtuk ruangah a si thei tiin harhdamnal lam cun an zum.

Dr.Soe Thet Win cun “Raltlan an si tikah hmun dangdang ah an tlan ṭheu. Tlan rero a ṭul tikah phannak an nei a si thei ih an tlan rero tikah harhdamnak hrang taksa hrangih ṭha khal an ngaituah thei lo,ngai poimawh thei lo khal a si thei,” tiah a ti.

Paletwa peng sungah AA le Myanmar ralkap cu January thla in July thla tiang vei 11 lai nasa zetin an kap aw tiah theih a si ih Rakhine ramkulh le Paletwa ramri ih kahawkmi siar tel loin Paletwa ramsung ih an kahawk zat Burma News International in a tarlangmi a si.

Raltlan buaipitu lamih ṭuanvo neitu pakhat Mai Nan Win cun “Ziangruangah naupai nupinu pawl nau thla an tam ciamco timi cu Paletwa kiangkap ah bomb puak a tamih ,hriamhrei picang a tla tam tuk. Ral buainak thawn hla deuh ahcun nau thla an tam ciamco lo ih ral buainak kiangkap ih um pawl cu nau thla tam an si. Khat le khat doawk cu cem lohli sehla kan duh ih an do aw thotho dig asikhalle mipi um lonak , khua thawn hmunhla ah do aw ding an si. Mipi umnak le khua kiangkap ah an do aw cu mipi hrang ṭih a nung tuk lawmmam ih siatnak phunphun an thlen rero tlunah nunau , nauhak le naupai nupinu pawlin an tuar hleice a si,” a ti.

AA le ralkap doawknak ruangah Paletwa peng sungah raltlan an tamzet thlangih Paletwa khawsung ah mipum 5000, Sami khawsung ah mipum 3000 le Khua dangdang ah mipum 500 hrawng an um. 2019 kum ihsin cekfel asile Paletwa peng sungah nau thla nupinu 119 an um thlang a si.

Be the first to comment

Leave a Reply

Your email address will not be published.


*