Chin Ramkulh Sungah Tlawng Hminpe 6,426 An Um Zo Ih Paletwa In Hmai A Hruai

Ralkap in may 24 in tlawng ap thok ding ti ih thu a suah hnu may 27 tiang Chin ramkulh sungah tlawng hminpe 6,426 an um zo tiah theih a si ih tlawng ap tamnak bik cu Paletwa peng a si.

Pine fimzir zung hotu cun “Tuhrih ahcun Chin ramkulh sungin tlawng ap tambik cu Paletwa peng a si. CDM tuah zirhtu khal an um mumal lo ih tutiang ah tlawng ap 2303 an um zo. Chin ramkulh huapin hramthok tlawng ah hminpe 3,710 , lailak tlawngah hminpe 2,183 le suakthuan tlawng ah hminpe 533, an zaten tlawng hminpe 6426 an um zo. CDM tuah zirhtu pawl cu ban an si ih thla 6 sungah dilnak an thehlut thei. Thla 6 sungah dilnak an thehlut lo asile ban lanta ding an si.

Zirhtu pawl an cawl cu zirhnak ah a poi tuk. Thimnak ah Hakha A-thah-kah 1 tlawngah 90 lenglo an um ih tu ahcun 7 lawng an si thlang. Curuangah tlawng 1,516 sungin tlawng 775 hrawng lawng cu an kai thei dingah kan ruat. Culo tlawng dang pawl cu zirhtu an um lo ruangah kan phuan thei ka zum lo. Tu ah tlawng zirhtu ding thar kawh rero an si ih a langte hrang men siloin a hnget ih zirhtu ding an si.

Falam tlawnginn ih bomb puak thu ah District fimzir hotu ,myone fimzir hotu tlunah nulepa pawl tel in relcat ding an si. Relkhawmnak an neih hnuah a him ih zirnak ding hmundang a um asile an phuan ding. Kannih ramkulh fimzir zung thawn pehparawknak a nei lo. Tlawng sayakyi ,tlawng pawlkom tlunah nulepa pawl tongaw in an relcat dingmi a si. Tuhrawng tlawnginn kiangkap ih bomb a puak ringring ruangah ralkap cun kilhim hna an tuan ding thu an relmi a um a si” tiah a ti.

Tui dinhmun Chin ramkulh sungin tlawng ap tamnak bik cu Paletwa peng a si ih Tedim peng in a thlun. Pathumnak ah Falam peng a um ih Thantlang peng cu tlawng ap malnak bik a si. Mindat cu ralkap in Martial law an phuan ruangah tlawng ap an um lo tiah theih a si.

Be the first to comment

Leave a Reply

Your email address will not be published.


*