CNDF In Thu 3 Hmangin Falam Mipi Ralrinnak An Pe Ih Thlun Lo Cu Hrem Ding

Falam mipi humhimtu hrangih dinmi Falam CNDF cun may 26 zingah thu 3 hmangin Falam mipi pawl ralrinnak a pe ih ralrinnak pekmi thlun lo cu hremnak an pek ding thu khal an suah tel.

Ralrinnak pekmi pakhatnak cu “Ralkap in daan loin rampi thuneihnak an lak tikah cozah hnatuan hrekkhat cu ralkap kuthnuai ah tuan paih loin mipi lam an tangih CDM an tuah. CDM tuah pawl cu ralkap in an hna in a ban tikah an hna lawng beisei in hna rak diltu nan um tiah kan thei. Cuvekih hna rak dil cu ningzah thlaktuk rori a si ih Chin miphun sitlak khal nan silo. Cuvekih cangvai pawl cu nan cangvaih dan bansan hngal dingah kan lo theihter ih nan bansan lo asile hremnak fumfe zet nan tong ding tiah kan lo theither duh.

Ralrinnak pekmi pahnihnak cu “Ralkap in rampi thuneihnak an lak hnuah mino tamzet cu nunnak hlanin ralkap uknak an dokalh ih Chin mipi tamzet khal khua ah him loin hramlak ah beunak an hawl phah. Raltlan nauhak pawl cu tlawngkai thei lo ding an si. Cuvek caan ah CDM tuah zirhtu pawl in tlawnghmin apmi pawl nan cohlang ih hrekkhat nulepa in nan fale tlawng nan ap. Raltlan nauhak hmaisong loin nan cangvai cu kan lo mawhthluk tukih bansan hngal dingah kan lo theihter. Theihternak nan thlun lo asile a tuldan vekin hremnak pek nan si ding.

Ralrinnak pekmi pathumnak “Ralkap in daan loin rampi thuneihnak an lakmi donak ah Chin mipi tampi kan tel. Kan ram, kan miphun le federal Democracy hrang kan zuam rero laiah hrekkhat Falam mipi lakin ralkap lamtang nan um tiah kan thei. Ralkap lamtang in thuthup simtheutu pawl cu nan sinak kan thei thluh zo ih kan lo zohthup ringring. Curuangah nan cangvaih dan bansan dingin ralrinnak kan lo pe ih nan basan lo asile nan nunnak hrang tihnung khop hremnak kan lo pe ding a si,” tiah an ti.

Be the first to comment

Leave a Reply

Your email address will not be published.


*