Denmark U-16 Hrang Lek Dingah Chin Tleirawl Salai Phun Za Mang Hril A Si

Chin ramkulh Matupi peng in Denmark ram ih thawn Chin tleirawl Salai Phun Za Mang cu bawhlung sit a thiam tuk ruangah Denmark rampum aiawh in kum 16 cin lek theinak ah hril a si.

Denmark U-16 team cu June 3 le June 5 ah Portugal U-16 team thawn Portugal ram ah rualremnak puai lek ding an si ih cumi hrang Chin tleirawl Salai Phun Za Mang cu hril a si. Tuih dinhmun ah Salai Phun Za Mang cu Denmark Bawhlung club picang pakhat Esbjerg ah lek rero lai a si ih Denmark U-12 hrang khalah hril a rak si zo. Bawhlung sit a thiam tuk ruangah Denmark’s Got Talent khalah Bawhlung thiamthil pholang in rak tel zo a si.

A upat vivo tikah Premier league club Liverpool hrang lek thei ding cu a tumtah pakhat a si ih hmaitlan hmun 2 ah lek thei a si. Tuih dinhmun a leknak dinhmun cu kehlam ving ( left wing ) a sibik ih alai hmaitlan dinhmun khalah a lek thei. A lehnak club Esbjerg cun “Kan player rinsan tukmi Salai Phun Za Mang cu Denmark ram U-16 aiawh in lek dingah hril a si. Portugal ram ah Portugal U-16 thawn vei 2 an lek ding. Poimawh zet puai ah lek dingin May thlasung ah Denmark U-16 Team ah a lut fel zo a si,” tiah thu an suah.

Salai Phun Za Mang cu 2005,January 25 ah suak a si ih tu ah kum 16 hmang rero lai a si. A nauhak lai in Bawhlung sit a thiam tuk tiah Denmark ramsung ih lar ban a si ih a lek thiamnak Left winger ah C.Ronaldo , Ronaldinho le Neymar tivek pawl cu Bawhlung leitlun ah hlawhtling tuk hlir an si.

Be the first to comment

Leave a Reply

Your email address will not be published.


*