Evan.Lar Boih Thawngtlak Kum Ṭhumsakmi Duhlonak Langter Ih An Audan Ding Pawl

Kum kim lo nunau pahnih a sualpi ruangah Kalaymyo tayazung in kum 43 sung thawngtla dingin hremnak a pekmi Evan.Lar Boih cu ramṭhen tayazung in kum 17 sung lawng thawngtla dingin a ṭhumsak tikah Kalaymyo ih nunau pawlkom le inntek lam lungkim loin August 26 ah duhlonak langter in zin an zawh ding thu theih a si.

Evan.Lar Boih cun Falam peng ihsin Letpanchaung an inn ah tlawng kai in um kum 15 nute cu 2015 kum ah a rak sualpi hmaisa ti a si ih kum 14 nute cu 2018 kum ah a sualpi tiin nunau lam cun 2018 kum ah thubuai an rak thehlut. Thubuai thawn pehpar aw in Evan.Lar Boih cu Kalaymyo tayazung in 2019, January 16 ah kum 43 sung thawngtla dingin hremnak a rak pe. Cumi cu tui ṭum ah ramṭhen tayazung in kum 26 hlonsak in kum 17 sung lawng thawngtla dingah a ṭhumsakmi a si.

Ramṭhen tayazung ih thusuakmi lungkimlonak lamzawh cu August 26, zinglam nazi 9 in thok ding an si ih Taungzalat zin ,Nyicia tat hmaiah an tong aw khawm ding. Lungkimlonak lamzawh cu Dingdi nunau pawlkom in an hoha dingih an audan ding khal an ruat fel thluh zo. An audan ding pawl cu Kalaymyo tayazung ih hremmi kum 43 sung thawngtla ding timi cu kan lungkimpi. Sagaing ramṭhen tayazung in kum 17 sung lawng thawngtla dingih a ṭhumsakmi cu kan lungkimpi lo. Kum kim lo sualpi thubuai ah thawngtlak kum ṭhumsak cu kan duh lo. Duhsaknak tel loin dik zetih lairelnak kan duh. Fale zangfahnak nei loin hremnak ṭhumsaktu zung hnaṭuan pawl cu an hna ihsin banter thluh si haiseh timi pawl a si. ( UCTN )

Be the first to comment

Leave a Reply

Your email address will not be published.


*