Falam Khawpi Hmun 2 Ah Ralkap Pawl In Meithal Hmet Puak In Unau Hnihte An Kap

Tuini may 22, nazi 11am hrawngah Falam khawpi hmun 2 ah ralkap pawl in meithal an hmet puak thu theih a si ih meitat zung lam tlang helnak zinah le Congheng zin ah a si. Tuhrih ahcun Falam mipi pawl cu Mitat zung lam tlang helnak zin feh lo dingah simtheih an si ih Congheng le Zamual ah ralkap an um thepthep tiah tarlang a si.

Cumi thuhla ah Falam CDM dinpitu pawlkom cun “Tuni may 22, zing 11:30 kiangkap hrawngah mitat zunglam tlang helnak zin ih Inn sak hnatuan unau hnihte bike in an feh laiah Uico pawl in an kap. Asinan, Pathian ih lamhruai umpinak in Kap cu an kap ngah lo. An kap thinphang ah a naupa cu bike par in a dawp ih hramlak ah ke in tlan. A upa sawn cu bike in a tlan. A upa cu inn lam a thleng zo ih a nau deuh sawn cu hramlak in tlan a si ruangah neta deuh ah himten inn a thleng thei ve. Mitat zung umnak lam tlang helnak zin cu hrial ding a si. Zokhal vaktawi nawn lo ding.

Cuvek thotho in zing 11:30am kiangkap hrawng thotho ah Congheng ih mino pakhat cu bike in a suk ah a hmai ih feh Uico motor cu a lan. Cumi ah Uico pawl in cawl dingin an auh. Cawl loin bike cak nawn in a tlanih a dunglam Uico pawl cun hronak ah meithal an hmetpuak. Congheng le Zamual lamah uico pawl an um thepthep. Kan feh sukso tikah ralring fimkhur ten kan sukso pei uh,” tiah Falam mipi theihternak an nei a si.

Be the first to comment

Leave a Reply

Your email address will not be published.


*