Fate Pahnih Hmeihpi Cingin A Kut In Bible Vei 7 A Ngan Suak Thluh Ih A Thuanthu Rel

Mizoram Aizawl khawpi Ramhlun North vengih um Pi Lalthianghlimi cun Bible thianghlim cu a kut in vei 7 rori a ngan suak thluh zo. Tu ah fate 2 hmeihpi in nun hmang rero lai a si ih Bible a ngan suak dan cu a hnuailam bangin relfiangnak a nei.

Bible a ngan suak thok dan cu thihnak ruangah lungleng riahsia in a um caan a si ringring. Hmaisa bik Bible a ngan suak tum cu a pasal u neihsun a thih ruangah a si ih ,vei 3 a ngan suak hnu 2018 kum November thla ah a pasal Lalchuanawma cun a thihsan ve. A pasal rori thi cu tuarthiam loin a ngan peh nawn lo lawk nan, Pathian in hnemawknak ah hmang dingin i fial tiah a ti ih a ngan pehsal. A thok ahcun Bible siar in lungleng riahatnak cu a rak hnem aw ringring nan, online ah bible ngan suak timi a hmu ih a pasal a ron hnuah a pasal siannak thawn ran ngan thok a si. A ngan thok lai caan ahcun naukai nei a si ih nau ihthah caan , a sungte pawl ihthah caan tivek ah a rak ngan. A kut khal a tling phah ih nuam a ti tuk ruangah a kut thling cing khal in a ngan peh thotho.

Bible vei 7 a ngansuak thluh hnuah Pi Lalthianghlimi “Pathian bomnak in may 10, 2021 ah Bible vei 7-nak cu ka ngan suak. Pathian thlawsuah ka donzia le a ropitnak cu relcawk ding a silo. Ka pasal in kum 7 sung in dampi ih i dampi laiah Bible cu vei 3 ka ngansuak man. Vei 4-nak ka ngan lai ah in thihsan ih ngan peh thei loin rei tuk ka rak um. Asinan, Pathian lo pan ding dang an um cuang lo tiin ka rak ngan pehsal.

Pasal zun tuar cingih ngan cu a ol lo nasa ih mithli tla phah ih ka ngan caan a tam. Asinan, ka tuahsuak ding a si timi tumtahnak thawn kan tang tento ih zinglam nazi 2am ah tla tho in ka ngan tento. cutin , a tawp a tawp ahcun Bible vei 7 ka ngansuak fel cu a si. Ka pasal umlai ahcun ka kiangah i tawi’awm ih tisa i tuahsak, Pathian thu kan ruah aw ih a nuam thei tuk. Pasal um nawn lo hnu cu a har tuk nan, ka pasal in kum 7 sung i dampi ruangah ka pasal hngilhlonak hrang vei 7 cu ka ngansuak ding tiah thu ka botcat.

Minung dan in ka tum men ih hlawhtlinnak cu Pathian hnenah aum timi thei in thlacamnak thawn ka dil ringring ih Pathian cun hlawhtlinnak cu i pe. Asinan, ka ngan laiah nasa zetin Setan cun i do. Natnak i pe ih thisen pek tul tiangin ka um. Asinan, Pathian in natnak ziangkim a neh thei tiah a hnenah ka sim ih Pathian cun ka natnak pawl khal in laksak thluh zo a si,” tiah a ti.

Bible vei 7 ngan suak theh dingah pen 524 a hmang. A vei khatnak Bible a ngansuak tumah ni 428 a rei ih ,avei hnihnak Bible a ngansuak tumah ni 299 a rei. Bu thum a ngan suak tumah ni 384 a rei ih bu linak a ngan suak tumah ni 335 a rei. Bu nganak a ngan suak tumah ni 254a rei ih bu ruknak a ngan suak tumah ni 165 a rei. Bu sarihnak a ngan suak tumah ni 206 a rei a si.

Be the first to comment

Leave a Reply

Your email address will not be published.


*