Hakha Feh Ding Ralkap Mawtaw Cu Falam CNDF In An Rak Do Ih Ralkap 6 An Thi

Chin ramkulh Hakha khawpi kiangkap ih CDF Hakha le ralkap doawknak a sosan tuk ruangah ralkap cun Kalay in ralkap mawtaw 2 cu may 21 zingah Hakha lam ah an kuat. Cumi cu CNDF Falam in an theih tikah lamlak ah an rak bawh ih Falam le Kalay karlak ah an do aw.

Falam CNDF le ralkap cu May 21, zinglam nazi 8 le 9 kalak ah do aw an si ih an doawknak ah CNDF lam in Salai Cungte cu ram hrang a nunnak a hlan. Doawknak ahcun ralkap lam ralbawi pakhat tel in ralkap 6 an thi tiah Falam CNDF in mipi theihternak an nei.

Falam CNDF cun “Chin ramkulh, Falam peng, Lumbang khaw kiangah May 21, zing nazi 8 hrawngah CNO/CNDF le tualthat acozah ralkap pawl karlak ah kahawknak a suak ih CNO/CNDF lamin miralṭha pakhat nunnak a liam, tualthat acozah ralkap lamin ralbawi (Captain) pakhat telin ralkap 6 an thi. Tualthat acozah ralkap pawlih mawṭaw khal lamzin thlangah a let thla. Tualthat acozah ralkap lakin ralkap pakhat hriamhma tuar tel le a dang ralkap pakhat, an zaten ralkap pahnih an tlansuak thei,” tiah ca an suah.

Tuini May 21 thotho ah Kalay in ralkap mawtaw 10 cu ralkap le ralthuam khat in Chinram lam an pan tiah theih a si ih khawitawk bik an feh ding timi cu theih a silo. Saklam laitlang ah Hakha , Tedim le Falam khawpi fehnak zin ah tiin ralkap le CDF doawknak a um. Thlanglam laitlang ah Mindat khawpi cu ralkap in an uk ih Kanpetlet CDF le ralkap cu an hringhro aw rero. Falam CNDF cu Chinram humhimtu CDF sungtel thotho an si.

Be the first to comment

Leave a Reply

Your email address will not be published.


*