Mindat Khawpi Sungah Ralhrang Pawl In Mipi Dawr Le Inn An Bauh Ih Thil An Ru

Chin ramkulh Mindat khawpi sungah ralhrang pawl an cangvai maksak deuhdeuh ih minung um lonak inn le dawr pawl cu an bauh siat hnuah thilri an ruksak. Hivek cu Mindat khawpi an lak ni may 15 in an tuah thokmi a sinan, may 22 sun ah rapthlak tukin an cangvai bet.

Ralhrang tih in khawpi suahsan an tam tikah inn lawng, dawr lawng tivek a tamih cumi pawl cu ralhrang pawl in may 22 sun ah an va bauh siat vivo. Eicop dawr in an duhmi eiin , thuamhnaw dawr in an duhmi thuamhnaw, phone dawr in an duhmi phone tivek an lak hnuah lamzin le inn hmai ih retmi mawtaw le bike tivek khal an siatsak vivo bet.

Khawpi sungih umsun pawl cu duhduh in leng an suak ngam lo ih inn sungah a relh in an relh ve. Ralhrang pawl cu deh ding hawl in a sun ,a zan an tawivak. Cuvek ruangah remcanlonak ruangih khawpi suahsan thei lo pawl khal ngaihtuah um zet an si. Cutilai in khawpi suahsan pawl cu hramlak ih um an si ruangah eiin tlunah umnak ding hrang an buai tuk. Ralhrang an tam tuk ruangah duh vekin bomnak khal pek a theih lo.

Ralhrang cun may 13 in Mindat peng cu martial law a rak phuangih may 15 in an uk thok. Mipi humhimtu pawl cu mipi ruat tukah may 15 ah dung an rak sip lawk ih may 19 in lamlak ih um ralkap pawl cu an do thoksal. May 21 khalah mipi humhimtu le ralkap pawl cu Mindat khawpi in peng 30 hranwg hla tlukah an do aw ciamco. Cumi ah mipi humhimtu lam 1 a thi ih ralhrang lam 3 an thi tiah than hmaisa a sinan, neta ah lamzin ih an phummi pawl kan siar tikah ralhrnag thi cu 5 an kim tiah mipi humhimtu cun thu an suahsal a si.

Be the first to comment

Leave a Reply

Your email address will not be published.


*