Nun Pakhat Kan Neihmi Cu Pathian Le Chin Mipi Hrangah Hmang Uhsi – Mai Far Men Par

 

Hlasakthiam Mai Far Men Par cun nun pakhat kan neihmi cu Pathian hrang le Chin mipi hrangah hmang dingin Chin mipi a cah ih ziangkim kan tuahmi ah Pathian cu pakhatnak ah retin ,amah Pathian naih ih a hrang rin-um si dingin Chin mipi a sawm.

Vocal Degree tiang ngah zo hlasakthiam Mai Far Men Par cu 1972 kum ah Sim Dihai khua ih suak a si ih tui dinhmun ah Kalaymyo Taungzalt ih um a si. Kum 8 a ti in hla a sak thokih 1988 kum in a aw zaihla hmangin Pathian hna a rak ṭuan thok. Kum 33 sung a aw zaihla hmangin Pathian hna a ṭuan zo. “Lungte Cu Au Hlah Seh” timi le “Lai Mino” timi hla in mipi theihhlawh thok a si. Bulpakin Album 18 a suah zo ih hla fing 300 hrawng a sak zo. Rualpi lakih a telnak cu hla fing 40 hrawng a si.

Tui dinhmun khalah hla thar fing khat buaipi reromi a nei ih hlasak peh vivo a tum. A hrok naa ruangah Sibawi in hlasak a kham nan, Pathian rinsan le Pathian hnenih pekawk a duh ruangah tuisun nitiang Pathian thangṭhatnak zaihla sak peh rero a si.

Chin mipi lungput thleng dingih a duhmi cu “Keimah timi lungput nei lo dingin , Pakhat le pakhat relsiatawknak bansan dingin a si ih hlasak pawl hnen ahcun Album pakhat lole hla fing khat tuah menah mah le mah sangtuk ih ret aw hngal lo dingin ,Pathian thuthangṭha sim pawl hrangah pulpit cu thinheng hrikthlaknak ah hmang loin Pathian thulawng simsawn dingin” tipawl an si.

Chin mipi hnenih a cah duhmi cu “Nun pakhat ka neihmi hi Pathian hrang le Chin mipi hrangah hmang dingin, Pathian in nun pakhat in pe ih in petu hrangah hman ding. Cumi kan hmang ngah lo asile nun man nei lo kan si ding tiah a ti. Cumi tlunah ziang kan tuah asikhalle Pathian cu pakhatnak ah retin amah naih ih a hrang rin-um si ding” cu Mai Far Men Par in Chin mipi pawl a sawm duhmi an si. ( CMPT )

Be the first to comment

Leave a Reply

Your email address will not be published.


*