Ralkap In Falam Peng Lumbang Khua Ih Lai Meithal Nei Pawl An Laksak Thluh

Myanmar ralkap cun tuini may 25 ah Falam peng Lumbang khua ih lai meithal nei pawl cu inn tin ah lutin an cek vivo ih licence nei pawl khal an lak sak vivo thu khuami pawl hnenin theih a si.

Lumbang khuami pakhat cun “Hitawk khua ah mi paziat in lai meithal nan nei tiah cazin la in inn tin an lut ih lai meithal kol cu an lak sak vivo. Meithal zun 20 hrawng an la. Meithal nei inntek cu thu an sut ih thildang cu an ti lo. Tuizan khal Lumbang khua ah a riak ding a bang,” tiah a ti.

Lumbang khua cu Falam le Kalay fehnak zin tluanih um Falam peng khua a si. Tuvekin Lumbang khua ah ralkap in lai meithal an laksak vivo cu kan dung thilthleng ruangah siko ding tiah ruah a si.

Falam CNDF le ralkap cu may 21 zingah Lumbang khua kiangah an rak do aw ih ralkap 6 an thi tiah Falam CNDF in thu an suah. Doawknak ahcun Falam CNDF lamin Salai Cung Te cu ram hrang a nunnak a rak hlan. Lumbang khua kiangih an doawk thu cu Falam CNDF in ca an rak suahmi a si.

Be the first to comment

Leave a Reply

Your email address will not be published.


*