Raltlan Vekin Thuam Aw Ralkap In Mindat Mipi Humhimtu Pawl An Kap Ih Pakhat Thi

Thuneihnak atpitu ralkap pawl cu thuneihnak an neih vivo theinak dingah mak tuktuk in an cangvai thiam ve ih mipi dodan ding cu a phunphun in an ruat ve nasa. Mindat mipi humhimtu pawl khal ralkap cun may 21 sun ah raltlan vekin thuam aw in an va kap ciamco tiah Mindat peng mipi uktu cun thu an suah.

Cumi ah CDF Mindat lam pakhat a thi ih midang 9 cu hriamhma besia an tuar. Raltlan vekin thuam aw ralkap pawl cu CDF Mindat in raltlan taktak ah an rak ruat sual ih mipi humhimtu kiangte an thlen hnuah ralkap cun hmeithal hmetpuak in an kap ciamco. Doawknak ah ralkap lam 3 an thi ve tiah CDF Mindat cun thu an suah.

Mindat CDF tuanvoneitu cun “May 21, sun nazi 2 hrawngah a si. Ralkap pawl cu raltlan vekin an thuam aw ih sahrang an hruh. CDF Mindat lamin kilhim hnatuan pawl cun raltlan taktak ah an rak neih. Mipi humhimtu kiang an thlenzik zawngah ralkap pawl cu meithal phorhsuak in Mindat CDF pawl cu in kap cih. Ruah a sur tikah kannih lai meithal hmang hrang a buaithlak deuh. Doawknak ahcun Mindat CDF lam in miraltha pakhat kan can ih ralkap lam 3 an thi a si,” tiah a ti.

An doawknak hmun cu Mindat peng Kyuan Kyi khua kiangah a si ih may 21,sun nazi 2 in an do aw cu zan nazi 6 tiang cawl loin an do aw peh. Ralkap lam mipum 100 hrawng an si tiah Mindat CDF lam cun an rel ih ,tuini may 22 khalah ralkap cun mipum tamsawn cu Kyuan Kyi lamah an kuat tiah Mindat CDF hotu cun a rel peh a si.

Be the first to comment

Leave a Reply

Your email address will not be published.


*