Rethei Zet Dinhmun In 6D Thawn Phun 10 Ong Thei Chin Tleirawl Khal Bawmtu Nei Zo

Myanmar rampum huap phun 10 result ah Wijar twai dinhmun in hmat tambik 520 tlunah 6D ngah thei Chin tleirawl Wai Yan Linn Kyaw cu phunsang tlawng a peh vivo theinak ding hrang bawmtu a nei zo.

Chin Tleirawl Wai Yan Linn Kyaw cu Irrawaddy ramṭhen Kyiankhin Myone Zinandaung khua in phun 10 phi a si ih tui kum Myanmar ram Wijar twai ah 6D ngah thei le hmat hmu tambik a si. A nauhak laiah a pa ( kawl ) cu rul cuk in a rak thi ih a nu ( Asho Chin ) in a hmeihpi. An khua cu khawte berek meisa ngah lo le Phone signal khal um lo a si ih phun 10 cu bawda ah um loin tlawnginnpi ah kai a si.

Cuvek dinhmun ah beidong men loin a dinhmun a fiang, hmat tamzet thawn phun 10 a on rori a ṭul timi a thei ih nasa zetin a zuam. Ca a thiam ruangah zirhtu pawl khalin an ngaina ih amah khal felfai zet a si. Kuva a ei lo,kuak a fawp lo ih nuncan ṭhazet a nei. Unau 3 an si ih upat bik nunau pasal nei zoin Thailand ah hlawh aw a si ih a nau pahnih tlawngkainak ding a kuat ṭheu. Amah khal innsang thawn a si tikah duhvekin a kuat thei lo. Wai Yan Linn Kyaw ih nau cu phun 8 kai rero lai a si.

Hivek dinhmun in phun 10 cu 6D thawn a ong ih Wijar twai ah hmat tambik a si cu online ah nasa zetin thehlar a si. Harsa te dinhmun in phun 10 ong a si ruanah phunsang tlawng peh dingin sumpai an nei lo,  a dinhmun in a tlin lo tiah a thuhla tarlang rero sak a si ih mi tampi in a thuhla an rak hmu, an zangfah , midang hmuh dingah an thlahzawng vivo cu bawmtu ding a nei zo.

Mai dinhmun thei ih zuam ,teima , nuncan ṭha Wai Yan Linn Kyaw bawmtu ding cu Yangon ih ABC Telecomm Company Co Ltd, (MIB Group of Companies) Director Daw Phyo Phyo Win a si ih phunsang tlawng a ṭheh hlansung a cemliam hmuahhmuah a tumsak thluh ding a si. ( Pyi Myanmar )

Be the first to comment

Leave a Reply

Your email address will not be published.


*