Tuini Nikhat Lawngah Chin Ramkulh Sungin Tlawng Hminpe 1,796 An Um

Ralkap cozah cun June 1 in tlawng a phuan thok ding thu mipi theihternak a neih rual in may 24 in may 31 tiang cu tlawng hmin pek caan a si thu khal an rak phuang. Tuini cu ralkap cozah ih phuanmi tlawng hmin pek caan ni khatnak a si. Cumi ah Chin ramkulh sungin tlawng hminpe 1,796 an um thu fimzir zung hotu hnenin theih a si.

Fimzir zung hotu cun “Tuhrih ih cazin kan tuah dan vek asile tuini nikhat ah chin ramkulh myone 7 sungin hramthok tlawng ah hminpe 966, lailak tlawn ah hminpe 662, suakthuan tlawng ah hminpe 168 tiin an um. Tuini cu ni khatnak a si tikah tlawng hmin an pe tuk hrih loin a langih may 31 tiang tlawng hmin pek caan a si tikah ni khat hnu ni khat a danglam vivo ding. Hakha Kg ah 4, phun 1 ah 4, phun 2 ah 4, phun 3 ah 2, phun 4 ah 11,an zaten 25 an si. laitlak tlawng ah phun 5 ah 1,phun 9 le phun 10 khalah pakhat veve an si.

Falam ah tlawng hminpe zaten 244 an um ih lailak tlawng ah 168 hminpe an um. Lailak tlawng timi cu phun 5,6,7,8 tinak a si. Hihmuah cu Falam peng sung hminpe hrih an si. Tedim ahcun hramthok tlawng ah 156 le lailak tlawng ah 42 tiin hminpe an um ih suakthuan tlawng hminpe an um lo. Tonzang in hramthok tlawng ah 107, lailak tlawng ah 85 le suakthuan tlawng ah 13 tiin hminpe an um hrih a si,” tiah a ti.

Chin ramkulh sungah myone 9 an um ih Mindat le Kanpetlet myone sungin tlawng hminpe cazin cu theih a silo. Ziangahtile ,myone pahnih cu tui dinhmun an buai tukih tlawng hminpe an um khal zum a silo. Ralkap in thuneihnak an lak hlanah Chin ramkulh sungah tlawng zirhtu 13,000 hrawng an um in hminsin a si. Ralkap in thuneihnak an lak hnuah Mindat peng le Kanpetlet peng sungin CDM tuah cazin theih a silo ih cumi lo myone 7 ah zirhtu 7000 hrawng cu CDM an tuah dingah ruah a si.

Be the first to comment

Leave a Reply

Your email address will not be published.


*