Tulai Kan Laimi Gospel Singer Tampi Cu Mintami Vekin Kan Cei Aw – Evan Dr.Ṭha Nei Fai

Kan laimi Pathian thuthangṭha sim lakah Pathian mi hman zet pakhat Evan Dr.Ṭha Nei Fai cun tulai kan laimi Gospel singer pawl ah zoh mawi lo, mintami vek rori ih cei aw an tam thu le bansan a ṭul zet thu Online LIVE thuthangṭha simnak ah  a rel tel ih Chin mipi khalin an pompi zetmi a si.

Evan.Dr.S.Ṭha Nei Fai cun “Vancungmi pawlin Pathian an ṭhangthat asile ziangah an hup aw thluh timi cu a thangṭhattu lang loin an thangṭhatmi lawng a lang. Thangthattu lang an tum lo. Unau pawl ṭhaten ruat ve uh. Tulai kan laimi singer tampi cu mintami vekin kan cei aw ,kan mit kan dum ih kan hlasak khalle ti rekrek mawi lo phang tukin kan um. Thungai thlak nun ih hlasak tampi khal nan um,Asinan lar duh menih hlasak nan tam tuk lai. Ceiawk dan mittlang dum tla cu VCD hrangah dum ciamco nawn hlah uh, hlawhhlang pawl ceiawk dan a si.

“Pathian thangṭhatnak ah mittlang dum riairiai in, mirang in an ti khalle mirang hlolak an si ih va cawng hlah. Pathian hmaiah thianghlim ten le tangdor ten a ti. Mintami le model vek zikzik ih cei aw singer nan tam deuhdeuh. Hakha pawl hmuah an zaten kan ti lo, ṭap khuahkho in hla an sak thei. Falam mi hmuah ṭah lamlam meng keukeu deuhdeuh, ṭahnak hla sak khalle meng keukeu. Pasal hawlnak ah hlasak hman ding a silo, nupi hawlnak men a silo, nun a si.

“Hlasak pawl nan zaten ka lo tilo,Asinan tamsawn cu nan zir aw vivo. Saya Tial Uk in hla tam tuk a phuah ih hlasak pawl ceiawk tuk tla a duh lo. Mittlang dum tla a duh lo. Hla an tuah ah amah khal a tel ringring,a bawm ṭheu.

“Kannih Falam mi singer nunau hrekkhat pawl mintami vek thinlung sang tuk,hngal tuk an tam tuk. Pathian khal ṭihzah lo, mipi khal ṭihzah lo mintami vek hnipuan makmak thawn ceiawk kan tum. Cuvek ding a silo, tangdor ten Bawipa thangṭhat ding. Vancungmi pawl Pathian an thangṭhat tikah an hup aw thluh hokhaw, lang an tum lo , lar ciamco an tum lo.

“Hla lam ka rel peh hrih ding !hla lam hi lungawi zawng , a lamzawng le tuarnak lam mithli thawn khal sak ding. Tulai singer hrekkhat cu laam durdo tengteng lawng an tum ih hla ler lawnglawng an duh. Cukhal a dik lo. Thangṭhatnak hla um seh,sermon khalah thangṭhat um seh. Tuarnak lam um seh, peknak lam um seh. Bawipa ruangih cannak lam um seh. A laam durdo lawnglawng kan duh khal a dik cuang lo.

“Thuthangṭha khawmpi kan tuah khalah a laam ti durdo lawnglawng. Hla hruaitu khalle ti kangko ten kha-ta rori kan duh ih tiphul vek kan cang thluh. A phul ah kan feh thluh. Duh lo ding ka ti lo, duh ding a si ih rawi thiam thluh ding. Evan pawl cu naa deuh ih thurel kan hmangih a naa asile bulpak zohman tisanmi a um lo. Pathian hmaiah Pathian duhzawng kan thangṭhat theinak dingah a si.

“Thinlung ngai taktak, sungril thawn taktak ih amah thangṭhat a duh. Mitthli thawn a ṭul caan le mithli thawn Bawipa thangṭhat sunloih Bawipa in a duh. Mawi tum tuk hlah uh, lipstick sen hlerhler le mittlang dum bansan thlang uh. Thianghlim ten mawi zetin ceiaw ko uh. Naa nan ti men thei nan, tulai Mizoram tla khavekih ceiawk an uar lo deuhdeuh. An hlasak a nungih ring tukin sak ngah an tum. Mawi an tum lo,sak ngah an tum. Kannih lam asile kan linglet deuhdeuh. Nan zaten ka lo ti lo, mi hrekkhat lawng hokhaw ka ti, ralting tuk tuk a si,” a ti.

Be the first to comment

Leave a Reply

Your email address will not be published.


*