Kum 2 Hnu Lawngah Covid 19 Natnak A Reh Ding – WHO

Leitlun harhdamnak pawlkom WHO aiawh in Director Tedros Adhanom Ghebreyesus cun Covid 19 natnak cu 1918 kum ih suak Spain flu vek a si ruangah kum 2 hnu lawngah a reh ding tiah mipi simtheihnak a nei.

Tedros Adhanom Ghebreyesus cun “Mipi in thu kan lung lo sinsin a si ahcun covid 19 nathrik cu darh deuhdeuh ding dinhmun ah a um. Asinan, khatlam ah covid 19 nathrik donak ding sii tawlrel rero a si ih kan tluang vivo a si ahcun kum 2 hnakih tuan khalah a thahnak sii hmu thei cu kan si,” tiah mipi simtheihnak a nei. ( BBC )

Covid 19 natnak cu China ram Wuhan khawpi in suak a si ih January thla in leitlun ah a rak darh thok. Tuah thla 8 sunglai covid 19 natnak in leitlun a nuai zo ih reh taktak ti a nei thei hrih lo. Hmun hrekkhat ahcun a luarkai deuhdeuh ih covid 19 do dan ah lomhlawh Myanmar khal Covid 19 natnak ruangah a buai thar ciamco sal.

August 30 zan tiang leitlun huapin covid 19 nathrik kai 25,215,867 an um ih an lakah thi 847,533 le damsal 17,562,186 an um. US ah nat kai 6,140,096 ,thi 186,874 le damsal 3,409,003 an um ih leitlun huapin nat tambik ah hmaihruaitu an si hrih. Brazil in nat kai 3,846,965 ,thi 120,498 le damsal 3,006,812 in a thlunih Pathumnak ah India um in nat kai 3,559,587 ,thi 63,788 le damsal 2,726,457 an um.

August 30 zan tiang Myanmar ah covid 19 nat nei 775 hmuhsuah zo a si ih an lakah thi 6 le damsal 352 an um. Tui dinhmun Myanmar ih nat kai thar an hmuh tamnak hmun cu Rakhine ramkulh ah a si ih Yangon khalah nat kai thar an um phah rero a si.

Be the first to comment

Leave a Reply

Your email address will not be published.


*