Ni 11 Sung An Kahawk Hnuah Doawknak Cawl Dingin Israel le Hamas An Lungkim

Ni 11 sung an doawknak hnuah Israel le Hamas cu kap aw nawn lo dingin thu an suah veve. kahawknak cu may 21 zingin cawl dingin Israel le Hamas cun thu an suahmi a si. Kahawknak cawl dingin hramlatu bikah Egypt a langih ram pahnih rem daihnak a tuahsak thei.

Egypt in a dil rero bangin Israel PM le ralthuam hotu pawl cu may 20 zan ah zamrang zetin meeting an nei ih Egpyt dilnak cu cohlangin kahawknak an cawlh ding thu an suah. Cumi rual in Palestine ram, Gaza khawpi ih um Israel do rerotu Hamas tapung pawl khal in kahawknak an cawlh ding thu an rak suah ve. Ram pahnih cun kahawknak cawl dingin thu an suah veve zo ih ,an thusuah vekin kahawknak cawl dingah leitlun khal in a duh.

Israel le Hamas kahawknak cawl dingin remnak tuahsak theitu Egypt ram cu US president Biden in a lawm zetih Israel le Palestine cu hmailam khalah buainak um ruri loin hahdam ten um cio dingah a duh thu a rel cih. Ni 11 sung Israel le Hamas doawknak ruangah Palestine lam mipum 230 an thi ih cumi sungin nauhak 65 le nunau 35 an tel. Israel lam mipum 12 an thi tiah phuan a si. Israel in Gaza khawpi a kah ruangah Palestine mipi 72000 hrawng cu an inn suahsan in hmunhim ah thawn phah an si.

Ram pahnih cu may 10 in rak kap aw thok an si. May 7 in Israel palik le Palestine mipi an buai thokih May 10 in Palestine ram, Gaza khawpi ih um Hamas tapung pawl cun Israel khawpi cu rocket in an rak kap thok. Cumi ruangah Israel in Gaza khawpi cu a kap ciamco ve fang. East Jerusalam ih Palestine innsang 6 cu Jesrusalem suahsan dingin dawi an si ruangah Palestine lam lungawi thei loin buainak an rak hawl rero zo.

Cumi tlunah Israel cozah in tui kum cu Jerusalem tlang ah mipum tamtuk umkhawm kan siang lo tiah thu an suah bet cu Palestine lam lungawi lonak a luar sinsin. Jerusalam tlang ahcun Muslim pawl biaknak Mosque a um ve. Mosque ih Muslim pawl an umkhawm laiah Jerusalem day hmang Israel mipi cu Mosque lam an va pan ih Israel palik in buainak um lo dingin kilhim hna an tuan. Cumi cu Palestine mipi in lungto le thiri phunphun in an rak den tikah mipi le Israel palik karlak ah buainak a suak ih Hamas tapung pawl tel ve in an rak buaithok dan a si.

Be the first to comment

Leave a Reply

Your email address will not be published.


*