Theihkauhnak : India Cozah le Facebook Buainak Ruangah Mipi Hahdam Thei Lo

India le China buainak ruangah India cozah cu Social media companay thu ah a ralring deuhdeuh ih China tuahmi Social company lawng siloin leitlun social company zate cu February 25 ah ralrinnak a rak pe. Ralrinnak a pekmi cu thla 3 sung caan a pe ih may 25,2021 ah a cem.

India cozah in Social company thu ah duhdan a nei ih daan thar a tuah. Cumi thlun lo cu India ram sungah hman theih loin kham thluh a tummi a si. May 26 zing tiangah India cozah le Facebook cu remaknak an nei thei hrih lo ih Facebook lam cun thla 6 sung caan pe hrih dingah an dil. Cumi cu India cozah in rem a tipi pei maw,rem ti loin Facebook cu a duh tiktikah a phit men ding timi ah mipi an hahdam thei lo.

India cozah in Social Company pawl hrang daan a tuahmi cu “Social comapany zaten cozah thuhnuai ah an um dingih cozah in zohfel theinak a nei ding. Cozah cun social company pawl zohfeltu pawlkom thar a din dingih pawlkom thar cun duhtawk in social company pawl cu cek theinak an nei ding. Cumi tlunah social company pawl in India ramsung ih an umnak hmun le sinak cipciar cu cozah hnenah an pe thluh ding. Cozah ih duh lole huatmi thuhla cu hlonsak ding a si ih hlon tlak le tlak lo zohtu ret ding. An thiltuahmi ziangkim cu cozah hnenah an theihter thluh ringring ding. Social hmangtu lakah daan thlun lo cu cozah hnenah thlen ding, Cozah ih ruatmi pawlkom cun social ih thutha lo tivek hlon le block theinak an nei ding,” tivek pawl cu a tlangpi a si.

Social company titikah Internet hmangih kan hman theimi social app zaten a tel thluh ih Facebook sungah Instagram le Whatsapp an tel tikhal kan thei ko ding. Twitter khal a him cuang lo ih social company zate hrangah India cozah ih thusuahmi a si. Remawknak an nei thei pei maw timi cu theih ban a silo. Hrekkhat cun VPN hman dan zir cia sehla a fuh ding titu khal an um.

Asinan, Facebook cu China social company siloin US hrambun a si ruangah US le India pehtlaihawk cu a tha hrih ih remawknak an nei thei ko ding tiah ruahsannak an nei. Culawng siloin tui dinhmun khalah India ramdang vuanci cu US ram ah um in US cozah thawn hnatuan tlang dan ding rel rero lai a si. Cutirual in facebook cu US cozah ta siloin bulpak a si ve. Facebook sungih tel Whatsapp fehdan thar ding thuhla khalah India cozah le Facebook cu an rem aw thei lo zo a si.

Be the first to comment

Leave a Reply

Your email address will not be published.


*