Zarh Hnih Sung WHO Ram Tin Palai Meeting Ah Myanmar Ralkap Sawm An Silo

Leitlun harhdamnak thuhla thawn pehpar aw in zarh hnih sung WHO sungtel ramtin palai thurelnak neihmi ah WHO cu Myanmar ram aiawh in zo a sawm sawn ding timi ah a buai tukih zohman sawm lo lawlaw in Myanmar aiawh tel an um lo.

Cozah dinglai kan si ih kanmah in rampi kan uk ruangah ramleng pawlkom khalah tel vivo ding kan si tiah aungaw zetin rak rel rero zotu ralkap cozah cu WHO In a member sungtel ram tin palai komkhawm zarh hnih sung meeting a tuahmi ah a sawm lo. Cuti rual in NUG cozah khal sawm an si cuang lo ih Myanmar ram buainak ah WHO cun zosawn a hril ding timi a botcat thei hrih lo.

Leitlun harhdamnak thuhla rel dingin WHO zarh hnih sung meeting cu may 17 in an thok zo ih June 1 tiang thurelnak nei ding an si. Zarh hnih sung thurelnak ahcun ziangtin hmailam ah ke an kar vivo ding timi tlunah hruaitu thar hrilnak khal an nei ding. Culo thupi poimawh tamzet khal relnak an nei dingih leitlun a dam vivo theinak ding hrang khua an khang ding. Cumi ah Myanmar ram aiawh in sawm ding an thei lo.

Tuitum meeting ah Myanmar ram aiawh in WHO cun zohman a sawm lo nan, neta ahcun Myanmar ram aiawh in zosawn cozah ah a cohlang ding timi cu a bawhcah fel a tul thotho. Cumi hrang WHO cun UN thuron a dil rero tiah theih a si ih UN in zosawn cohlang dingin thuron a pe ding timi cu WHO in Myanmar ram aiawh in cozah a hril fel caan ah a fiang puppi dingah ruah a si.

Be the first to comment

Leave a Reply

Your email address will not be published.


*