Benjamin Sum Thuanthu In Thazang Ka Ngah Tuk Lawlaw- Actress Naw Phaw Eh Htar

Lemcangthiam Naw Phaw Eh Htar cun Benjamin Sum cu a hna ah zuam tuk mino tiin a rel hnuah a thuanthu in thazang ka ngah tuk tiah a rel peh.

Naw Phaw Eh Htar cu Benjamin Sum ih hla fing hnihnak “Khatlam Inn Ih Fala Nute” timi ah lemcangtu a si ih Benjamin Sum hla ah lem a cang cu social ah thluntu a ngah deuhdeuh. A hlan khalah lemcangthiam milar le mipi duh co zettu cu a si hrimhrim nan, Benjamin Sum hla ah lem a cang cu Benjamin Sum mipi tamzetin social ah an thlun cece ih mani August 20 ah thluntu One Million a kim thei thu a tarlang. Benjamin Sum thawn lem an cang tlang thei cu nuam a ti ih a hla pawl khal a duh zet thu Naw Phaw cun a rel rero zo.

Tuiṭum khalah Naw Phaw cun “Myanmar Idol season 4 ṭheh ah kan kawhhran in kan hnenih khawm dingin Benjamin Sum an sawm cu a ra ih an sungkua thu in tetti-khannak a nei. Cumi ka ngai ,ka theih tikah thazang ka rak ngah tuk. A thuanthu cu ruah ding tlakzet a si ih hitluk nauhak in a tong tam nasa tiah ruahnak tiang ka neih phah. Cuvek caan ah amah vek kum note a dingtluan thei vivo cu thazang rori a si. Cumi khawmnak ihsin thei aw kan si ih Online in kan biakawk hnuah hnaṭuan tlang thei kan si.

“Online ih kan rel khalah kan duhdan cipciar zetin kan rel ih lem kan cang taktak cu a rak remcang tuk phah. Harsa zet dinhmun cu a paltlang vivo tikah thiltha a tong vivo zo. Nufa te an si nan,a hnenah duhdawt lainatnak a khat. Cumi tlunah thapetu mipi a nei tam tukih amah thapetu mipi pawl cu duhtawk taktak ih amah thapetu an si. Hmailamah ziangtin mipi hrang ke a kar vivo ding timi cu amai kut ah a um ih tuhrih ahcun a zuam nasa tuk. A zuam tlunah ziangmi a ṭul timi khal a zohaw thiam ih a hna ah thinlung a pe. A theih lomi midang sut ding khalin a khul a fung lo lawlaw a si,” a ti.

Myanmar Idol season 4 zuamawknak ih tel mi tamzet cun bulpak in hla an suah cio nan, tuini tiang one million kim thei zohtu nei zohman an um hrih lo ih Benjamin Sum cu a hla 2 rori in zohtu ngah tuk le MILLION kim veve zo an si. A hla hmaisa sawn cu nikhat le nazi 6 ah One Million zohtu an kim thei ih a hla neta sawntu cu nikhat hman ṭul loin nazi 15 sungah zohtu one Million kim thei a si.

Be the first to comment

Leave a Reply

Your email address will not be published.


*