Benjamin Sum Cu A Theihnak Hmuah Suah In Zuam Tuk Mino A Si – Naw Phaw Eh Htar

Lemcangthiam Naw Phaw Eh Htat cun Benjamin Sum cu theihnak le thaneih hmuah suah in zuam tuk rori mino tiah a lawm ih hla thar pahnih a suah zomi khal a duh tuk veve thu a rel.

Lemcangthiam le Model Naw Phaw Eh Htar cu Benjamin Sum ih hla thar fing hnihnak “Khatlam Inn Ih Fala Nute” timi ah nunau dinhmun in lemcangtu a si ih a hmelṭha , a zei tlunah cangvaih dan a thiam tuk cu mipi duh co zet a si. Amah cu Kum 24-nak hmang rero lai 1996 kum ih suak Model le lemcangthiam a si ih 2018 kum in Myanmar zuknung leitlun ah a rak lut thok. 2019 kum ih a canmi “A hloralmi thudik Pawl” timi ihsin mipi duh hleice le lar sinsin lemcangthiam pakhat a si ih tuini tiang Myanmar lemcangthiam lakah larzet mi pakhat a si. Amah cu karen pa-o miphun a si ih lemcan le model lamah a lar sinsin cu tui dinhmun Telenor Myanmar le Sunkis Myanmar khalah Ambassador ṭuan rero lai a si.

Benjamin Sum hla thar fing hnihnak ih lem a cang thu ah Naw Phaw cun “Benjamin Sum hla ih lem ka can thei dan cu biakinn ah veikhat kan tong aw dah ih veikhat cu a hla ah lemcang dingin le hla ngai hmaisa dingah i kuat. Hla ka ngai san cu duhnung zet a si ih lemcan dan ding khal mithlam ah a lang cih. Cutikah na hla cu duh a um tukih lem cu ka rak cang ding tiah ka simthei.

“Himi hla cu suah a tumnak a rei zet zo ih Covid 19 boruak hlanah suah a tummi a si. Asinan,keimah ka rak buai zetih ka man tikah lockdown boruak in a peh cih cu kan zuk thiam lo. Himi hla cu a hla hmaisa bik dingih a tummi a sinan, a remcan thei lo ruangah a hla pakhat sawn cu a rak suah hmaisa.

“Lemcan cu ni 2 sung ka rei ih zan ih lakmi a um tlunah ruah sur ruangah kan hngak ,remcang lo neuhneuh tivek thawn duh hnakin kan rei nan, kan zaten duhthusam ih kan canmi a si ruangah hlim zetin kan ṭheh thei. Cumi tlunah lockdown hlan ihsin kan rel zomi felfai ten kan ṭheh thei cu cinken tlak zet le diriam thlakzet a si.

“Kei cu lemcang ṭheu ka si bangin lemcan ah ka buai tuk lo ih Ben Ben khal camera hmai ih hlasak ṭheu a si ruangah buainak a nei lo. Veikhat le veihnih ningzah caan a nei zik ṭheu nan, a rak ti thei nasa. Ziangkim a remcang zetih ka ruah tikah duhnung zet sulhnu a si. Ben Ben cu hna zuam zet mino pakhat a si ih a theihmi le thiamnak zaten suah in hmangsuak le zuam a si.

“Tuiṭum ih a hla ah thinphan thupmi pakhat ka nei,cumi cu a hla hmaisa mipi duh a co tuk ruangah tui ṭum ih a hla in a hla hmaisa dinhmun a tluk lo tuk pang ding timi ka phang. A hla hmaisa khal covid 19 boruak thawn remzet a si bangin ka duh tukih tuiṭum ih a hla khal duhdawtnak hla duhnung tuk a si. Ka thinphan thupmi cu a hlan ih hla a tluk lo pang ding timi a si ih a hla 2 in an ṭha tuk lawlaw a si,” a ti.

Ben Ben ih hla thar fing hnihnak cu nazi 15 sungte ah ONE MILLION zohtu an kim man ih a hla hmaisa bangin mipi duh zetmi ,ngai reromi le zoh reromi hla a si. Naw Phaw cun Benjamin Sum ih mipi (Summer Pawl ) pawl khal lungawi thu a sim cih ih Benjamin Sum hla ih lem a can ruangah pangpar ṭhawn mawizet an pek cu manhla a ti tuk thu a simthei a si.

Be the first to comment

Leave a Reply

Your email address will not be published.


*