Mindat Hrang Korea Won Ting 1 A Kuat Ih Myanmar Thuhla A Rel Cu Mipi An Tap Thei

Makeup Artist le Freelandce Model Hanna Yuri cun Korea TV Channel in Interview an tuah man Won ting 1 a donmi cu Chin ramkulh Mindat khawpi ih raltlan pawl hrang a kuat zo thu a rel.

Model Hanna Yuri cu Shan miphun Myanmar mi a si ih ,tui dinhmun ah S.Korea ram ah tlan le um a si. Social media in siseh Korea TV channel phunphun in Myanmar ram buainak thu cu leitlun theih ah aupi rerotu a si ih Korea mipi khal Myanmar harsa pawl bawm dingin kut a dawh rero lai. Interview ih thu an suhnak ahcun Myanmar thuhla a rel cu sup aw thei loin a tap suak ih mipi khal sup aw thei loin an tah thu an rel ve.

Interview cu hmun 2 in tuah a si ih hmaisa sawn ah Myanmar ram buainak thuhla phunphun a rel ih neta sawn ah Midat thuhla a relmi pawl an tel. Interview cu Kawl tong in rel a dil nan, mirang in rel dingah korea mipi in an dil ih thiam le thiam lo cingin mirang hmang a si thu khal mipi a ruah.

Model Hanna Yuri cun “ka video hnuaiah Korea mipi in Myanmar mipi an bawm duh asile bomnak an pek thei dan cu ka tarlang. Tu ah Korea ka thlen hnu Interview man ih ka ngahmi won ting 1 cu Mindat hrang ka hlu. Ralkap in khawpi sung inn tin ah lut in duhtawk ih mipi an dekcok cu leitlun mipi an thei thlang. Hivek pawl cu Myanmar ramsung ih um Kachin, Chin, Karen , Rakhine le Shan miphun pawl in kan tonnak a rei tuk zo. Kannih tlangparmi pawl cu kan pupa pawl ih umnak kan hmun le ram ah kum 70 sung lenglo hrem, nautak ,dik lo zetin tuah le dekcok kan tuar rero zo a si,” tiah a ti.

Myanmar in Korea ram a tlan thei dan cu a hmin le Korea hmin a bangawk tuk ruangah a siko ding tiah a rel ih vanzam khalah ralkap sungte pawl a tomi cu a um nuam lo zet thu a rel. Milar tampi cu Airport ah kaih an tong ih anih cu Korea lole Japan lamah a nneih si ko ding tiah a ti. A thurelmi famkim zoh duh hrang a hnuai video ah zoh theih a si.

Be the first to comment

Leave a Reply

Your email address will not be published.


*