A Cem Tiang Kan Do Ding Aw, Bom Kan Tul Ve Tiah Raldo Zirnak Dinhmun Reltu Model

Myanmar aiawh in Miss zuamawknak ah rak tel zo Model Htar Htet Htet cu Myanmar ralkap uknak duh loin tlangpar ralthuam kai pawlkom hnenah raldo zir rero lai a si. Raldo a zirnak dinhmun mipi a ruah rualin an eiin khal pholangnak a nei ih a cem tiang do dingah mipi a sawm.

Model Htar Htet Htet cun “Sakhan ah ka um ti thei in raldo zir dingah ra nan zaten ka lo upat tuk. Cumi tlunah keimah ka um ve timi thei in sakhan bomnak pe theutu pawl khal nan parah ka lungawi tuk lawlaw. A cem tiang do dingah zirnak nei zaten ka upat ih nehnak kan co tiang tel dingah ka lo sawm duh. Lainatnak thawn bomnak pe theutu pawl khal raldo zirnak hmunah bomnak pe vivo hrih dingin ka lo sawm.

Ziangahtile ,raldo zirnak hmun zaten ziangkim kan tulsam thluh. Duhdawt zangfahnak thawn pe theutu pawl ruangah raldo zir pawl hrang thazang le cahnak a um ih cuvek an neih vivo theinak ding cu ka duh a si. Raldo zirnak hmun tinkim ah ka um tiah in ruah sak uh. Cumi rualrual in raldo zirnak hrang sumpai dik lo zetih hawltu tivek an um pang maw tivek khal kan zingzoi that a tul ve a si,” tiah a ti.

Ralkap do dingah raldo zir mino tamzet an um ih an zirnak hmun a bangaw lo cio. Hrekkhat KNU, hrekkhat KIA le hrekkhat Free Burma Ranger tivek tlunah hmun dangdang ih zir an si. Khawitawk ih zir khal ralthuam tlunah eiin tiang an harsa tuk tiah theih a si.

Be the first to comment

Leave a Reply

Your email address will not be published.


*