A Fanu Ngai Tuk Ih Inn Tlung Duak Cu Ralkap Simtu An Um Ruangah An Kai Ngah

Myanmar hlasakthiam pakhat Aye Thin Cho Swe cu ralkap uknak duh loin dokalhtu pakhat a si ruangah ralkap cun pukmah 505 hmangin thubuai an rak tuah sak ih kai dingin thu an suahnak a rei zo. Cuvek ruangah hlasakthiam Aye Thin Cho Swe cu ralkap lakin him dingah inn suahsan cun a rak tlan ve.

Asinan, inn ih a tansanmi a fanu ngai tuk cu kan dung zarh ah inn a tlung duak cu may 23, zan nazi 7:30pm hrawngah an umnak Yangon Hlaing 12 veng Shwe Parami ah ralkap cun an kai ngah. Hlasakthiam Aye Thin Cho Swe cu zarh khat hrawng inn ah a fanu thawn an umtlang zo ih inn ah a um timi cu theitu an um tikah ralkap hnenah thuthup an sim ih cutin an kaih ngahmi a si.

Ralkap in kai dingin thu an suah hnuah tlan ih relh rero zo nan, inn ih tlungsal ruangah kaihmi an um hnuaihni zo. Cuvekin lemcangthiam Paing Takhon khal ralkap in an rak kai zo. Cuvek ruangah kai dingin thusuah zo mi milar zokhal kan tlan ih kan relh zo a si ahcun inn lamah tlung hnuaihni loin relh khiokhi men uhsi tiah milar Pencolo cun mizan thotho ah sawmnak a neih phah ve.

Pencilo

Milar Pencilo cun “Ralkap in kai dingin thu an suah zo mi cu zokhal inn ah tlungsal ding kan silo. Cuvek ruangah hlasakthiam Aye Thin Cho Swe khal ralkap in an kai phah. Inn ah zarh khat fang lawng a um man tiah ka thei ih a fanu ngai tuk ruangah tlung duak cu a si. Kai dingin thusuah zo mi cu in kaih theilonak dingah um ding kan si. Nauhak kan nei ih kan ngai tuk ruangah um thei lo ding asile hruai mai ding. Kan boruak hi a setuk nan, kan pomthiam cu a tul. Keikhal kai dingin thu an suah tikah ka relh ih thla 1 liam hnuah inn tlung duak dingin ka rak um dah. Naute nu ka si vekin ka theihthiampi tuk nan, tui kan dinhmun cu nunnak thap in thuruah le thucawhcahnak neih caan a si ruangah fikhur a tul tuk. In phulotu hnenah pekawk lo ding tlunah lenglam khalin ralkap cu a theih dandan in kan dopeh thei a si,” tiah a ti.

Be the first to comment

Leave a Reply

Your email address will not be published.


*