Boruak A Fel Hnu Lawngah Hrilawknak Kan Tuah Ding Tiah Reltu Min Aung Hlaing

Myanmar ralbawi Min Aung Hlaing cu China thuthang Phoenix TV cun online in thusuhnak a nei ih thusuhnak an neihmi cu mipi hrang an thlah fel zo. Cumi ah ralbawi Min Aung Hlaing cun hrilawknak thu tlunah Aung San Suh Kyi thu khal a reltel.

Ralbawi Min Aung Hlaing cun China TV Phoenix hnenah “Kannih ralkap ih duhdan cu party dinhmun in Democracy Federal uknak rampi fehpi ding a si. Asinan, cuvek thleng dingin hrilawknak cu ram boruak a daih fel hnu lawngah kan tuah ding. Kum khat sungih tuah a theih asile tuah a si dingih cumi hnu thla 6 tlunah le boruak ih zir vivo khal a si ding,” tiah a ti.

Ralbawi Min Aung Hlaing cun rel peh in “Mipi le ralkap buainak ruangah mipi thi 700 lenglo an um zo an timi khal a dik lo,mipi thi cu 300 hrawng lawng a si. Ralkap le palik khal 47 thi an um ih hriamhma tuar 200 lenglo an um ve. Aung San Suh Kyi cu hmaiton in Court ah a feh thlang ding. Tui dinhmun khalah a inn ah dam zetin a um a si,” tiah a ti.

Ralkap in rampi thuneihnak an lak hnuah mipi thi 800 an um zo tiah AAPP cun thu an suah ve. Ralbawi Min Aung Hlaing cu China thuthang Phoenix TV in Online in thu a suhmi a si ih China ram ,Beijing khawpi in thu an suhmi cu Min Aung Hlaing in Myanmar ram Naypidaw khawpi in thusuhmi pawl a let. A thurelmi zoh tikah China bum a tumih hrilawknak an tuah ding caan khal felfai in an rel thei nawn lo tinak a si.

Be the first to comment

Leave a Reply

Your email address will not be published.


*