CDM Tuah Lo Sayakyi Umnak Tlawng Cu Bomb In An Den Puak Hnuah An Urkang

Kan ram buainak thla 3 le hrek a lan verver zo ih thla 4 a kimfel zik thlang nan, buainak cu reh lam pan thei loin a sosang deuhdeuh. A hleice in boruak siat laiah ralkap in tlawng phuan an tum cu buainak a luar deuhdeuh.

Tlawnginn kiangkap bomb puak cu may 24 in theih rero zo a si ih may 25 khalah tlawnginn kiangih bomb puak theih ding a tam tuk. Tanintharyi ramthen Dawei khawpi ahcun CDM tuah lo tlawng sayakyi umnak cu bomb in den puak a si ih tlawng hminpe tam deuhnak tlawnginn dang khal urkang a si.

Dawei khawsung um pakhat cun “Dawei khawpi ih ah-thah-kah 6 tlawnginn cu tlawng sayamahkyi CDM a tuah lo ruangah a umnak tlawnginn sungah bomb den puak a si. Vansiat ah a umnak ah tla ngah loin hmundang deuh ah an deng ngah ih Sayamahkyi cu a thi lo. Reilote ah ralkap an thleng cih ih an kilhim. Cumi hnuah Daawei khawpi sungih hramthok tlawng pakhat sung khalah bomb den puak bet a si.

Tlawnginn 2 lawngin a tuar ding hmang tiih kan ruah laiah tlawnginn dang pakhat cu zan nazi 10 hrawngah urkang a si. Cazirnak hmun tamzet a kangral thluh ih tlawnginn cu sak sal lo ahcun hman a theih hrih lo ding. Tlawnginn an urkangmi Kamyakin tlawng ahcun CDM tuah lo zirhtu pawl cun may 24 ah tlawng hminpe pawl an rak khum rero. Tuini may 25 ahcun tlawng hminpe zohman an um nawn lo a si,” tiah ramsung thuthang a simthei.

Be the first to comment

Leave a Reply

Your email address will not be published.


*