Covid 19 Darhsal Ruangah Rakhine Ih Tlawng On Zomi Khar Thluhsal Dingin Thusuah

Kan ram Myanmar khal covid 19 an do neh zik thlang tiin ṭuanvoneitu pawl an phur zet nan, August thla thokin Rakhine ramkulh sungah Covid 19 a darh ciamco sal ih tlawng phuan zomi pawl khal khar thluhsal dingin thu an suah.

August 16 ah Rakhine ramkulh Sittwe khawpi Bank hnaṭuan pakhat cu Covid 19 nat a nei tiah hmuhsuah a si ih ramdang feh lo, Myanmar ram suahsan lo a si. Khawitawk in natnak a kai timi ahcun bank ih sum suah mi pakhat khat hnenin tiah zum cih a si ih nat a kainak sum suahtu cu tuini tiang hawlsuak thei a si hrih lo. Ziangahtile ziangtikah nat a kai , ziangtik ni ih sum suah hnenin a kai ngah timi cu theihtheih a si lo.

Cuveten bank hnaṭuan hrekkhat khal covid 19 nat an nei maw tiah cekfel cih a si ih August 19 , 20 le 21 pawlah covid 19 nat nei thar cu Sittwe khawpi ah hmuh bet an si. Tui dinhmun tiang Sittwe khawpi ah Covid 19 nat nei 19 rori an um thlangih Sttwe khawpi ah innsung ah um khiokhi ding timi thu an suah. Cumi tlunah Sittwe khawpi in Myanmar ram hmundang ih feh zokhal an thlennak hmunah kharhkhum tengteng ding le covid 19 nat an nei maw tiah zohfel thluh ding an si. Culawng siloin tuini August 21 ah Rakhine ramkulh sungih suakthuan tlawng an phuan zomi hmuahmuah cu khar thluhsal dingin thupek cih an si.

Ramdang ihsin tlung in covid 19 nat an nei timi cu mipi hrang phan ding ciamco a um tuk lo nan, Rakhine ramkulh sungah ramsang suakvak loin covid 19 nat an nei timi an hmuhsuak cu daithlang ih um men ci a si nawn lo. Umdan cu theih lo sungah Covid 19 nat a darh rero zo ih ramdang tlung silo ramsung um hnen khalin kai a theih tinak a si. Rakhine cu ramdang naih zet le ramdang ihsin thupte tlung tamzet umnak a si ih hivekin covid 19 nat a darhsal khal ramdang ihsin thupte tlungin covid 19 an phurlut ih zum zet a si.

August 21 zing tiang Myanmar ah covid 19 nathrik hmuhmi 409 an um ih an lakah mi 6 thi le damsal 333 an um. Tui dinhmun sizung ih tuamhlawm reromi covid 19 nat nei damlo cu 70 cekci an si. ( Pyi Myanmar )

Be the first to comment

Leave a Reply

Your email address will not be published.


*