Mipi An Um Sung Cu NLD A Um Ringring Ding Timi Daw Suh Kyi Ih Tongkam Thar

Ralkap in rampi thuneihnak an lak hnuah an kaihmi Daw Aung San Suh Kyi cu thubuai 6 an orhter ih,a thubuai neihmi thawn pehpar aw in avei khatnak hrang sihni pawl thawn hmaiton in tuini may 24 ah an tongaw thei.

An tonawknak hmun cu Naypidaw ralkap cozah hmunpi sungah a si. Daw Aung San Suh Kyi ih sihni 6 pawl cu ralkap pawl in mawtaw in an phurh hnuah Naypidaw ralkap cozah hmunpi sungah an luhpi ih innpi sung room pakhat ahcun an tongaw. Minute 30 sung caan pek an si ih an umnak room cu CCTV bun thluh a si. Caan an pekzat cu Daw Suh in thubuai 6 le sihni 6 hrang ahcun a mal tuk tiah a duhthusam lo thu a rel.

Sihni 6 le Daw Aung San Suh Kyi an biakawk thu ah Sihni 6 lakin hruaitu bik Daw Min Min Soe cun “Daw Suh cu minute 30 sung hmaiton in kan be thei ih caan a khop lo zet ruangah minute 30 cu mal a tituk thu a rel. Cumi sungah in simmi pakhat cu mipi pawl damcak dingin thla cam sak thu le NLD party cu mipi hrang dinpi a si ruangah mipi an um sung cu NLD party a um ringring ding timi a si. Kan biakawknak room ahcun ralkap pawl an lut ve lo nan, CCTV an ret thluh a si,” tiah BBC a simthei.

Daw Aung San Suh Kyi cu a thubuai buaipitu sihni pawl in hmaiton in an biak thei bangin Court khalah hmaiton in avei khatnak hrang a lang thei ih hmailam khalah hmaiton in thufel thei vivo dingah a beisei tuk. Tu ah ralkap cun thubuai 6 an tuahsak ih thubuai 6 hrang sihni 6 a nei. Thubuai 6 an orhtermi pawl cu kiangkap hnaihnok ,covid 19 daan thlun lo, ram hminseter, sumpai lalut thup ,rampi dokalh le thupte thilri lalut tivek pawl an si.

Be the first to comment

Leave a Reply

Your email address will not be published.


*