Mipi Humhim In Free Burma Ranger Pakhat A Nunnak A Hlan

Kaya ramkulh Demawso myone ah mipi humhimtu pawl bawm in Free Burma Ranger pawl in ralkap an do ve timi cu kan dunglam ah mipi theihter zo a si ih ,may 27 sun ah mipi humhim in Free Burma Ranger pakhat a nunnak a cem phah thu mipi an theihter.

May 21 in , tuini May 28 tiang Demosaw myone mipi humhimtu le ralkap cu cawl loin do aw ringring ih Free Burma Ranger cu Demawso mipi humhimtu lamtang in ralkap dovetu an si. Hivekin an doawknak caan ah ralkap pawl an sung cu khua mipi umnak ah an cangvai ciamco ih ,Free Burma Ranger cun ralkap pawl cu an va do tlan. Cumi ah Free Burma Ranger sungtel pakhat Awl Sein cu ralkap in an rak kap ngah ih a nunnak a cem cu May 27 ah an vuiliam.

Tui dinhmun Demawso myone dinhmun ah mipi humhimtu lam cun “May 27, mizan nazi 8 hrawngin zanvar in kap siko. Puak thei phunphun le ralthuam phunphun an hmang. Mipi umnak khal zianghman ren loin an kap ciamco. May 28 , tuizing nazi 6am in meithal an hmet puak ciamco sal ih mipi cu leng suak ngam loin innsung ah an um thluh. Innsung ih um mipi khal an inn parih bomb a tlak pang ding an phang tuk a si,” tiah a ti.

Khua ih um pakhat cun “Kum upa le nauhak cu hramalak ah kan kuat tlangpi ih tu ahcun thilri kil inn hngak pawl lawng khua ah kan um. Eiin thu ahcun hramlak ih um an harsat bangin khawsung ih um pawl khal kan harsa thlang. Cumi tlunah kan inn sungah ralut in ziangtikah in ra kap that ding tiah thinphang in kan um ringring a si,” tiah a ti.

Free Burma Ranger timi cu American ralbawi hlun le Pastor hlun David Eubank ih dinmi a si ih Tha U Wah A Pah tiah karen hmin a pe aw. 1996 hrawngah Pathian thuthangtha sim in Myanmar ramsung hmun tinkim ah a feh ih tlangparmi pawl dinhmun a theifiang zet phah. Kachin, Kaya, Karen le Rakhine tivek cu Pathian thuthangtha sim in a rak hrawh neknek thluh.

Tlangparmi pawl lakih ralkap pawl sualzia a hmuh tikah ummen thei loin 1997 kum ah Free Burma Ranger timi a rak din. A tumtah bikmi cu ralkut ih taang pawl runsuak tlunah harsa pawl a phunphun in bomnak pek a si ih raldo dan a zirh tlunah Pathian thu thawn a kaihruai hai. Raldo rori an tumtahmi a silo ih mipi zonzai runsuah le a phunphun ih bawmnak pek cu an tumtahmi a si.

An thuanthu sirhsan in leitlun lemcangthiam hminthang Sylvester Stallone khal in “RAMBOO IV” timi zuknung cu 2008 kum ah a rak suah ih cumi khalah tuantlang le tel ve an si. Cuvekin Myanmar mipi pawl ih harsatnak le zonzoihnak pawl cu UNHCR hnenah simtheihnak an nei sak ringring a si.

Be the first to comment

Leave a Reply

Your email address will not be published.


*