Mipi Humhimtu In Ralkap Le Palik 20 An That Ih Nung Cingin 4 An Kai

Shan Ramkulh Moebye khawpi ih mipi humhimtu PDF pawl cun tuini may 23, sun nazi 1 hrawngah Moebye khawpi kiangih palik sakhan cu an do ih tlangpar ralthuam kai pawlkom thawn an tantlang tikah ralkap le palik lam sung neknek in a hmunah ralkap le palik 20 an that.

An thah ngah lomi ralkap le palik 4 cu nungdam in an kai ih ziangtik an tuah vivo ding timi cu mipi theihternak an nei hrih lo. Moebye ih palik le ralkap umkhawmnak sakhan khal mipi humhimtu pawl cun an urkang felfai thluh lawlaw. Ralkap le palik hrekkhat cu fawm hruh man lo khal an rak um ih fawm hruh lo hrimhrim in mipi do khal an um theu.

Moebye cu Shan ramkulh sungih um a sinan, kaya ramri ciahciah ih um khua a si. Kalay ramthen Demawso khalah mipi humhimtu PDF le ralkap doawknak a nasa zetin May 21, 22 ah mipi humhimtu pawl cun ralkap le palik sakhan hmun 2 an rak urkang sak. Cumi ah kaya mipi humhimtu pawl cu Free Burma Ranger timi ralthuam kai in an bawm.

Tuitum ih Moebye mipi humhimtu PDF teh zoin a bawm timi cu felfai in theih a si hrih lo. Moebye mipi humhimtu PDF cun ralkap le palik umkhawmnak sakhan an urkang rual in ralkap le palik 20 an thah thu, nungdam in 4 an kaih thu le anmah mipi humhimtu lam pakhat thi le hriamhma tuar 5 an um thu cu mipi an theihtermi a si.

Be the first to comment

Leave a Reply

Your email address will not be published.


*