Myanmar Ah Covid 19 Nat Nei Thar 100 Zikte An Hmu

Covid 19 thuah thumnak in leitlun a buaiter thok lala ih Myanmar ramri India , Malaysia le Thailand ram pawl cu covid 19 natnak thuam thumnak in an buai vutvo zo. Cumi ah Myanmar mipi thawn pehtlaih aw tuk India cu leitlun dinhmun in tui dinhmun ah covid 19 natnak luarbik a si ih dem lam an pan thei hrih lo.

Ramri pawl covid 19 natnak in an buai cun Myanmar khal ramleng tlung tivek cu covid 19 natnak an neih le neih lo cek thok rero thlang a si ih may 27 ni lawngah Myanmar ramsung pum huapin covid 19 nat nei 96 an hmuh thu Myanmar harhdam zung in thu a suah. Tu ahcun harhdam zungih hnatuan an daihawk lo tuk ruangah nat nei an hmuhmi pawl umnak cipciar cu tarlang a si hrih lo.

Asinan, Chin mipi tamzet umnak Kalaymyo sungin 5 an tel tiah theih a si ih Sanmyo ah 1, Tahan ah 3 le myohla ah 1 tipawl cu May 27 ni ah kalaymyo in covid 19 nat nei thar an hmuhmi pawl an si. Thawsam natnak nei ruangah sizung in va zoh aw an si ih an lakah myohla khawmi cu Mizoram Zokhawthar in Myohla ih tlung pekte a si. Tui dinhmun Kalaymyo ah covid 19 nat nei 9 an um tiah theih a si ih kan dung zarh ah mi pakhat cu covid 19 natnak in mual a rak liam.

Myanmar ram ah covid 19 natnak a luar vivo a si ahcun rampi buai lai thawn a buaithlak tuk rori ding. Tuitum ih covid 19 natnak thuam thumnak cu thawsam rori ih an buai hngal ruangah Oxygen daih aw loin thih phah tampi um theih a si.

Be the first to comment

Leave a Reply

Your email address will not be published.


*