Nuhmei Fa Pakhat Lawng Nei Ka Si ih Ka Fa In Thah Sak Tikah Nun Dan Ding Ka Thei lo

Ralkap in rampi thuneihnak an lak hnuah mipi an thahmi 800 a kim fel zo ih an thahmi tamsawn cu lamzawh duhphorhnak nei mipi menmen an si. An kah thatmi pawl cu an lu rori ah kah ngah an si tlangpi ih tum nei in mithat an si.

Ralkap in mipi 800 tlun an thahmi lakah Mandalay ramthen Kyauk Padaung myone Tuang Nok khua ih um Nuhmei Hla Hla Win ih fapa Win Myo Oo khal a tel. Daw Hla Hla Win cu fapa a neih pekah a pasal in a rak thihsan ih theitawkin a fapa cu Engineer Degree a ngah tiang tlawng a kaiter. A fapa Degree a ngah hnuah bulpak in hna a nei ve thlangih a nu cawm thok ding a silai ah ralkap cun lamzawh duhphorhnak ah an kap that.

Nuhmei Hla Hla Win cun “Ka fapa Win Myo Oo cu Engineer in Degree ngah a si. Yangon ah hnatuan in a um ih a hlawh khal an than thlang ding cu i sim. Ralkap in rampi thuneihnak an lak hnuah Yangon ih a um ringring cu ka seherh tukih khua ah tlung dingin ka ko. Khua a thlen hnu khalah don theih a si cuang lo ih lamzawh duhphorhnak ahcun ralkap in an kap that.

“Ka fa! na nu keimah lawng ka si ih lamzawh duhphorhnak ahcun tel duh hlah aw, ka ti rero nan, daiten um men a theih lo tiah a tel ringring. A ruang khal ralkap hnenih a umlai ah in zohter fangih kei cu ka zoh ngam lo. Tu ah kum 50 tlun ka kai zo ih ka fa neihsun hrang theitawk in nun hmang rero ka si. Tu ahcun ka fa a um nawn silo, ziangtin ke ka kar ding tikhal ka rel thei nawn lo. Mai fa tlukih duhnung le ngainatmi cu leitlun ah an um lopi,” tiah a ti.

Be the first to comment

Leave a Reply

Your email address will not be published.


*