Ralkap Cu Lal Rei An Duh Ruangah NLD Hlonhlo Tum An Si – Dr.Sasa

Myanmar ralkap ih dinmi UEC thar meeting vei 2-nak cu may 21 ah neih a si ih ramsug party 93 um ih relmi ah party 59 cu meeting ah an tel. Zokhal bulpak in tel theih lo a si ih party hmin lawngin tel theih a si. Cumi ah party hrekkhat cu sim aw loin party hmin ih meeting rak kai khal an um.

Meeting ahcun UEC hotu thar cun NLD party cu 2020 Myanmar rampi hrilawknak ah dik lo zetin vote an ru ih ,dik lo zetin hrilawknak an tuah ruangah Myanmar ram Politics party in hlonhlo dingah an zuam rero thu a rel. Cumen siloin NLD party hruaitu pawl khal dik lo zetin hrilawknak tuahtu le mawhphurtu bik an si ih NLD party hruaitu pawl khal Myanmar ram politics ah tel thei nawn lo dingin tuah an tul ve tiah a ti bet.

Cumi thuhla thawn pehpar aw in Dr.Sasa cun “Ralkap in cuvek in khua an khang cu an lalnak reipi daih vivo duh ruangah a si. Myanmar ram cu Democracy ram ah canter an duh lo ih anmah tibuaitu bik NLD party cu an hlonhlo thei asile an lalnak a rei vivo ding tiah an ruat. Cuvek cu ralkap in daan loin rampi thuneihnak an lak ihsin an tumciami a si hrimhrim. Curuangah nehnak kan co tengteng a tul a si,” tiah amah thusuttu Reuters thuthang a simthei.

Daw Suh sihni khal in Daw Suh thubuai thawn pehpar aw in Ralkap pawl cun thubuai phunphun an orhter rero men ih neta bik ahcun Daw Suh cu Myanmar ram politics ah tel thei nawn lo dingin hrem an tum cu an tumtahmi a si tiah media pawl simtheihnak a rak nei ve zo.

Be the first to comment

Leave a Reply

Your email address will not be published.


*