Ralkap Cun Biakinn Ih Beu Pawl Cu Bomb A Thlakih Mi 4 Thi In Mi 8 Hriamhma An Tuar

Kaya ramthen sungah ralkap le mipi humhimtu pawl doawknak a nasa deuhdeuh ih ralkap in mipi humhimtu an doneh lo tikah mipi umnak khua le beunak biakinn tivek cu bomb in an thlak.

May 24, zinglam nazi 1 hrawngah Kaya ramthen Loikaw khawpi kiang Kayan thar Yar khua ah ralkap cun biakinn cu bomb a thlakih Biakinn sungih um nunau 3 le mipa 1 an thi. Midang 8 cu hriamhma bese tuk an tuar ih biakinn luhnak cu thisen hmuh ding a tam. Ralkap cun Kaya khawpi Loikaw tlunah a kiangkap ih khua pawl cu ralthuam picang hmangin a kap ih mipi humhimtu pawl a tihrim ciamco.

Cumi ah Kaya mipi humhimtu sungtel pakhat cun “Ralthuam hmangin in neh lo tikah khua ah an cangvai a sibik. Tuizing ah Biakinn cu bomb tenau in an kap ih mi 4 thi le hriamhma tuar 8 an um. Khawsung cu duhtawk in an kap ih an duhduh an kai. An ruahnak cu a laktlak lo nasa ih ralthuam nei lo mipi parah an tuan. Tlangparmi lakih ralkap pawl cangvaih dan cu tuitum lawng siloin hlan ihsin an cangvaih dan sawn a si,” tiah a ti.

Kaya mipi humhimtu pawl khal an cangvai turu zetih Loikaw khua tlunah Demawsaw khua kiangkap ih CDM tuah lo cozah innpi pawl cu a urkang sak thluh ve. May 21 in mipi humhimtu pawl cun ralkap le palik sakhan an la thokih an urkang tlunah ralkap le palik an that tam.

Cuvek ruangah ralkap cun Kaya ramthen in Hlaingkaw khawpi kiangkap le Demawsaw khua kiangkap cu teng mawtaw , tlunah tlunsang khal in an do ciamco a si.

Be the first to comment

Leave a Reply

Your email address will not be published.


*