Ralkap In Rampi Thuneihnak An Lak Hnuah Raltlan Ting 1 Lenglo An Um Zo

Myanmar ralkap in rampi thuneihnak an lak hnu February thla in , tui dinhmun tiang ramsung hmun tinkim ah raltlan ih beunak hawl mipum ting 1 lenglo an um zo thu UNHCR in thu a suah.

Raltlan umnak hmun pawl cu Kachin, Karen , Chin, Kaya , Shan le Sagaing ramthen pawl ah si. Karen ,Kachin le Shan ramkuluh pawl ahcun tlangpar ralthuam kai le ralkap doawknak ruangah khua ah mipi an him lo cu hramlak ih tlan an si ih Kaya , Chin le Sagaing ramthen pawl ahcun mipi humhimtu le ralkap an doawk ruangah khawsung ah mipi a him lo cu hramlak ih tlan an si.

Kaya ramkulh sungah raltlan 37000 lenglo an um zo ih Thailand ramri ah raltlan 85900 an um. Shan ramkulh sungah raltlan 15000 hrawng an um zo ih Kachin le Chin ramkulh sungah raltlan 20000 hrawng an um ve. Sagaing ramthen Kani pengih mipi hrekkhat cu a langten hramlak ih relh duak an si ruangah UNHCR cun raltlan cazin ah a telh lo ih inn lamah an tlung rero thei thlang sihmang. Cumi tlunah Kachin ramkulh sungih raltlan 10000 hrawng a ret cu thawng 10 hnakin tam dingah ruah a si.

Karen cu ralkap in rampi thuneihnak a lak hnuah tlangpar ralthuam kai lakin nasa zetih ralkap rak do hmaisabiktu an si ih ralkap in ni 7 peh in vanzam hmangin a rak do phah tikah raltlan an rak tam tuk man. Cumi ruangah sipei maw tuih hnu lam KNU tha an thlah deuh tiah mi hrekkhat cun an ti. Cun, Rakhine ramkulh sungih raltlang ting lenglo cu ralkap in thuneihnak an lak hlanih tlan an si ruangah tuitum ah telh an si lo.

An tarlang duh bikmi cu ralkap in rampi thuneihnak an lak ruangah Myanmar mipi an him lo, khua suahsan ih raltlan ting 2 an kim zik thlang timi a si ih an tulsammi bomnak phunphun pe ding khal in an tawlrel rero. Tui dinhmun Myanmar ramsung ih bomnak pe rerotu World Food programme cu UNHCR hnuai ih hnatuan pawlkom a si.

Be the first to comment

Leave a Reply

Your email address will not be published.


*