Tlangpar Ralthuam Kai Pawlkom Pakhat In Ralkap Hnenah Biakawk An Duh Thu Ca An Kuat

Myanmar ralkap thawn kap aw nawn lo dingin remawknak NCA ca rak ngan tlangpar ralthuam kai 10 pawl ih dinmi remdaihnak buaipitu ding PPST cun ralkap thawn biakawk an duh thu ralkap hnenih ca a kuatmi cu mipi lakah a darh.

Biakawknak an duhmi cu ralkap thawn remawknak an rak neih bangin NCA thuhla a si thu ca sung ah a tel ih thu 7 hmangin ralkap cu biakawknak neihpi an duh thu an theihter. Thu 7 ahcun tuih dinhmun ram buainak cu ralkap ,party , mipi le tlangparmi hrang khalah thatnak a um lo thu,ram thasal lohli dingin biakawknak neih a tul thu, Myanmar ram buainak ah ramdang cu anmah hlawknak duh in an tel timi thu, Cuvek cu kan rak humhim tlang a tul timi thu pawl a tel.

PPST pawlkom cu ralkap thawn kap aw loin remawknak hawl vivo dingih NCA hminkhen rak ngantu tlangpar ralthuam kai 10 pawl ih dinmi NCA aiawh in ralkap betu ding lole remdaihnak zuamtu ding a si. PPST in ralkap ca a kuatmi cu NCA hminkhen ngan tlangpar ralthuam kai 10 pawl in an lungkimpi thluh maw timi cu felfai in theih a si hrih lo thung.

NCA hminkhen ngan tlangpar ralthuam kai 10 pawl cu All Burma Students Democratic Front ( ABSDF ), Arakan Liberation party ( ALP ), Chin National Front ( CNF ), Democratic Karen Buddhist Army ( DKBA ), Karen National Union ( KNU ), KNLA Peace Council (KPC ), Lahu Democratic Union ( LDU ), New Mon State Party ( NMSP ), Pa-O National Liberation Army ( PNLA ) le Restoratio Council Of Shan State ( RCSS ) pawl an si.

Be the first to comment

Leave a Reply

Your email address will not be published.


*